Sot ishte dita e tretë e protestës në Tiranë dhe qytete të tjera pasi qytetarët kundërshtojnë rritjen e çmimit të naftës që për pasojë ka sjellë dhe rritjen e çmimeve të tjera.
Në Tiranë u mblodhën dhjetëra qytetarë, të cilët qëndruan rreth 2 orë para kryeministrisë ndërsa më pas u zhvendosën në rrugën e Durrësit dhe tek rrethrrotullimi i Zogut të Zi. Ata paralajmëruan se ditën e nesërme në orën 11:00 do të jetë protesta më e madhe pasi do të vijnë edhe qytetarë nga e gjithë Shqipëria. Ditën e sotme, situata e tensionuar ishte në Durrës ku qytetarët bllokuan rrugët e qytetit dhe pati përplasje pasi thyen kordonin e policisë për të bllokuar autostradën Tiranë-Durrës.
20:30 Reagon presidenti Meta: Policia të distancohet nga ndalimet e pajustifikuara
Ilir Meta: I bëj thirrje Qeverisë të dëshmojë ndjeshmërinë dhe përgjegjësinë e duhur në adresimin e të gjitha çështjeve që po shqetësojnë me të drejtë qytetarët, të cilët prej ditësh po protestojnë, në mbarë vendin, për dinjitetin dhe të drejtat e tyre thelbësore.
Policisë së Shtetit i tërheq vëmendjen për t’u distancuar nga dhuna e papranueshme dhe ndalimet e pajustifikuara.
19:30 – Protesta në Tiranë, bllokohet rethrrotullimi i Zogut të Zi
Protestuesit janë zhvendosur tek rrethrrotullimi i Zogut të Zi, duke vështirësuar qarkullimin e mjeteve. Të pranishëm janë forca të shumta policie që po përpiqen të shpërndajnë protestuesit.
19:15 Protestuesit në Durrës hapin rrugën, vijon normalisht lëvizja e kamionëve dhe automjeteve që mbetën në mbikalim.
19:09 Protesta në Tiranë/ Qytetarët marshojnë në bulevard
Pasi qëndruan rreth 2 orë para kryeministrisë, qytetarët nisën marshimin në bulevard duke bllokuar rrugët.
“Populli i bashkuar” dhe “Asnjë lekë më shumë” dëgjohen duke brohoritur njëzëri protestuesit.
18:55 – Reagon kryeministri Edi Rama
Me anë të një postimi në Twitter, Rama thotë se nuk është populli, por pakica e zhurmshme në kërkim të rrëmujës. Sipas tij, protestat janë përpjekje e ulët e të njëjtave hije të së shkuarës duke iu referuar opozitës që e cilëson ndryshe si “dorën e nongratave të shpallur e të pashpallur”.
“Për kë e njeh dorën e nongratave të shpallur e të pashpallur, këto protesta janë një përpjekje e ulët e të njëjtave hije të së shkuarës për të manipuluar njerëzit duke hedhur gurin e fshehur dorën! Ky nuk është populli, por e njëjta pakicë e zhurmshme në kërkim të rrëmujës!”, shkruan Rama.
18:41 – Mbyllet protesta në Shkodër, Lezhë, Lushnje dhe Laç.
18:33 – Bllokohet lëvizja e kamionëve drejt portit të Durrësit. Dhjetëra kamionë e automjete kanë mbetur në mbikalim. Forca të shumta policore po përpiqen të lirojnë rrugën ndërsa kanë bllokuar hyrjen në mbikalim të protestuesve. Nisin thirrjet kundër qeverisë dhe thirrja ‘Turp’.
18:28 Shoqërohen mbi 10 persona në komisariat nga policia e Lezhës. Mes të shoqëruarve janë dhe 2 vajza.
18:24 – Protestuesit nuk dorëzohen. Një pjesë e tyre ngjiten në mbikalim, në sens të kundërt, për të dalë sërish në autostradë e bllokuar qarkullimin
18:17 – Protestuesit kanë ndaluar poshtë mbikalimit te Ura e Dajlanit dhe bëjnë thirrje që shoferët të fikin makinat. Pas çarjes së kordonit të policisë janë bërë dhe shoqërimet e para. Numri i lartë i të proceduarve për protestën e një dite më parë ka ndikuar në uljen e numrit të protestuesve në këtë ditë të tretë të protestës në Durrës.
18:10 – Protestuesit po lëvizin drejt Urës së Dajlanit që lidh qytetin e Durrësit me autostradën, ndërsa një pjesë po përpiqen të bllokojnë qarkullimin edhe në rrugën paralel me rrethimin e portit. Qytetarët kanë bërë thirrje që të mos ndërhyjë policia, të cilët kanë bërë edhe shoqërime. Ndërsa protestuesit kanë arritur të çajnë kordonin e policisë, të tjera forca kanë shkuar menjëherë në vendngjarje për të ruajtur gardhin e policisë.
Durrës – Qytetarët në Durrës protestojnë kundër rritjes së çmimeve ndërsa disa prej tyre mbajnë në dorë pankartën “protesto edhe ti për rritjen e pagave dhe pensioneve”. Në protestë ka prani të shtuar forcash policore që janë për të parandaluar çdo bllokim rruge. Protestës i bashkohet dhe Konfederata e Sindikatave.
Lezhë – Qytetarët janë ulur këmbëkryq në rrugë duke shkaktuar radhë të gjatë mjetesh pasi bllokuan autostradën Lezhë-Shkodër. Nuk ka zgjatur shumë çaste sepse ka ndërhyrë policia.
Bulqizë – Protesta ka nisur edhe në Bulqizë pasi protestuesit kanë bllokuar rrugën nacionale. Policia po përpiqet të ndalojë protestuesit që të marshojnë në rrugë.
Shkodër – Qindra qytetarë po marrin pjesë në protestë në qytetin e Shkodrës. Qytetarët kanë nisur të marshojnë nëpër qytet duke pezulluar lëvizjen e automjeteve. Nuk kanë munguar pankartat, përmes të cilave qytetarët përpiqen të japin mesazhet e tyre.
Pas reagimit të kryeministrit Edi Rama, çmimi i naftës këtë të premte ka nisur të ulet, por sipas një vëzhgimi të korrespondentëve të Top Channel në të gjithë vendin, vihet re se disa kompani ende abuzojnë duke e mbajtur çmimin më lart se të tjerët.
Top Channel
