Hiqen kufizimet, Presidenti Biden do të lejojë Ukrainën të përdorë armë amerikane për sulme brenda Rusisë 17/11 20:24
Deputeti i Partisë Demokratike, Agron Shehaj këtë të martë është paraqitur në zyrën e kryetarit të Këshillit Kombëtar të PD-së, Edi Paloka për të verifikuar një pjesë të firmave të delegatëve.
Në një video të publikuar nga zyra e Palokës, në praninë e kamerave të televizioneve, deputeti demokrat i telefonon një delegati të degës 5-së në Tiranë për ta pyetur nëse firma e vendosur në formularin e dorëzuar nga ish-kryeministri Berisha për të mbledhur Kuvendin Kombëtar të kësaj partie me datë 11 dhjetor ishte e tij.
Nga biseda mes Shehajt dhe delegatit, kuptohet se firma ishte vendosur me vullnet të plotë, ndërsa deputeti vazhdon me telefonatat e tij me delegatë të tjerë, veçanërisht në degët 5 dhe 7 në kryeqytet.
Nga ana tjetër, anëtarët e degëve 7 dhe 5 të Partisë Demokratike në Tiranë reaguan menjëherë, duke e konsideruar një veprim të tillë një show mediatik të deputetit demokrat Agron Shehaj, me arsyetimin se interesi i tij i vetëm është protagonizmi personal.
“Agron Shehaj dështoi të verifikojë firmat e demokratëve, sepse ai as nuk e njeh bazën e partisë, as nuk e respekton atë. Si drejtues politik i degëve 5 dhe 7 në Tiranë, Agron Shehaj nuk ka bërë asnjë takim me demokratët që prej ditës që u zgjodh deputet”, citohet nga reagimi.
Partia Demokratike e Shqipërisë thekson se në degën 5 dhe 7, por edhe kudo ka vendosmëri për të mos lënë demokratët në baltë dhe as për të lejuar nëpërkëmbjen e dinjitetit të tyre.
“Ne jemi në krah të demokratëve dhe interesit të Shqipërisë, me misionin e vetëm për rrëzimin e regjimit të Edi Ramës dhe rikthimin e PD në pushtet”, citohet më tej.
Me datë 10 nëntor, ish-kryeministri Sali Berisha dhe mbështetësit e tij dorëzuan firmat e mbledhura në selinë e PD-së, me qëllim mbledhjen e një Kuvendi Kombëtar me datë 11 dhjetor.
Ndërkohë ka pasur thirrje për dy Kuvende me data të ndryshme.
Më 15 nëntor, kryetari i PD-së në Shqipëri, Lulzim Basha, në fjalën e tij gjatë takimit me anëtarët e Kryesisë së PD-së, ka theksuar se “11 dhjetorin nuk mund ta shndërrojë dot Sali Berisha, nga dita e lirisë, dita e demokratëve, dita e demokracisë, në ditën e bunkerizimit të PD-së, në ditën e izolimit të PD-së”.
Kreu i demokratëve ka zyrtarizuar datën 18 dhjetor për mbajtjen e Kuvendit Kombëtar, e cila është kundërshtuar me forcë nga ish-kryeministri Berisha dhe mbështetësit e tij.
Në zgjedhjet parlamentare, Shehaj ka qenë një ndër deputetët më të votuar. Gjithashtu ai ka kandiduar për kryetar të PD-së, në zgjedhjet e mbajtura më 13 qershor.
Top Channel
