Kati i dytë i magazinës ishte kthyer në laborator droge. Policia e Lezhës ka sekuestruar dhe asgjesuar 205 bimë narkotike, të dyshuara canabis sativa.
Prej disa ditësh, policia e Lezhës e kishte nën monitorim magazinën në fshatin Gjorme të Kurbinit deri në finalizimin e operacionit.
Në pranga është vënë një 24-vjeçar, Vranicki Hisku si dhe është shpallur në kërkim drejtori i Kadastrës së Kurbinit, Edmond Stojani 41 vjeç.
Këta shtetas, në bashkëpunim me njëri-tjetrin, kishin përshtatur katin e dytë të një magazine të marrë me qira, me aparatura që shërbejnë për kultivimin e bimëve narkotike.
Gjatë kontrollit të ambientit u gjetën dhe u sekuestruan 205 bimë të dyshuara narkotike, cannabis sativa të kultivuara në vazo. Gjithashtu, gjatë kontrollit, në ndërtesë u konstatua një lidhje e paligjshme e energjisë elektrike, e cila shërbente për furnizimin me energji të pajisjeve si llamba, aspirator, filtra ajrimi etj, që ndihmonin në kultivimin dhe rritjen e bimëve narkotike.
Në cilësinë e provës materiale u sekuestruan të gjitha pajisjet që kanë shërbyer për kultivimin e bimëve narkotike,
Po gjatë operacionit, në banesën e shtetasit Vranicki Hisku është gjetur dhe sekuestruar dhe një armë zjarri pushkë me dylbi të montuar. Materialet për veprime të mëtejshme i kaluan Prokurorisë pranë Gjykatës së Shkallës së Parë Kurbin, për veprat penale “Kultivimi i bimëve narkotike”, “Armëmbajtja pa leje” dhe “Vjedhja e energjisë elektrike”.
Top Channel
