Kryesore Politikë Të Fundit

Fleta e votimit me numra/ KAS pranon ankimimin e PS dhe Bindjes Demokratike, rrëzon PD

03/04/2021 14:43

Komisioni Ankimimeve dhe Sanksioneve pas 3 orëve diskutim dhe një pushimi, vendosi të pranojë ankimimin e PS-së dhe Bindjes Demokratike, ndërsa ka rrëzuar atë të PD-së.

Sipas vendimit, për Bindjen Demokratike do të vendoset logoja e ristiluar. Me vendimin e fundit të KAS, fleta e votimit do të jetë me numra.

Anëtarët e KAS, Koli Bele, Ilir Rusmali dhe Elvin Lako votuan pro vendimit, kurse Ledio Braho dhe Elvis Cefa ishin kundër.

Socialistët kërkuan që kandidatët të identifikohen me numra, ndërkohë demokratët kërkuan që kandidatët të renditen në kolonë dhe jo horizontalisht.

Ndërsa Bindja Demokratike kërkoi në fletën e votimit rikthimin e logos së saj, edhe pse demokratët ishin kundër.

Përfaqësuesi i PS-së, Eridian Salinaji gjatë diskutimit tha se fleta e votimit e bën konfuz qytetarin për të zgjedhur kandidatin që do.

“Fleta duhet të mbajë hapësirën e posaçme, mënyra e votimit përcaktohet nga KQZ, votuesi do ta ketë të vështirë në fletë që të zgjedhë kandidatin që ai do. Ajo nuk mund të konsiderohet e thjeshtë dhe orientuese. Krijon pabarazi orientimi në fletën e votimit. Kjo do të sjellë radhë të gjata. Ai është një vendim nuk është zbatuar në fletën e miratuar nga komisioneri. Fleta e bën konfuz duke mos zgjedhur subjektin që dëshiron”, tha Eridian Salianji.

“Të lejë logon e Bindjes Demokratike, sepse jemi zgjedhur më parë si subjekt i tillë, kurse koalicioni është regjistruar si i tillë vetëm për këto zgjedhje. Nëse mendon se do të jetë Bindja Demokratike që të ndryshojë logon, ajo që kemi dorëzuar përpara vendimit të komisionerit që pranojmë të identifikohemi”, tha përfaqësuesi i Bindjes Demokratike, Fabian Topollaj.

“Logoja e Bindjes Demokratike krijon konfuzion. Është shkelur kriteri i qartësisë, prandaj hymë në atë zonën e turbullt që ligji e parashikon si kriter, kemi të drejtë kur këmbëngulim kur kërkojmë një fletë të votimit. Sa i përket kritereve të tjera nuk gjej shkelje nga ana e komisionerit”, tha përfaqësuesi i PD-së, Ivi Kaso.