Një kamion, që do të kalonte nga Maqedonia e Veriut në Kosovë, fshihte emigrantë të paligjshëm nga Afganistani.
Pas kontrollit në pikën kufitare të Hanit të Elezit, policia ka identifikuar shtetasit që po përpiqeshin të hynin në mënyrë të paligjshme.
Kamioni i bardhë, i pajisur me rimorkio u afrua pranë doganës sot rreth orës 04:00. Drejtuesi i mjetit, shtetasi me iniciale A.N. dyshohet se ka fshehur emigrantët në rimorkio.
Emigrantët i janë nënshtruar kontrollit shëndetësor, ndërkohë që policia ka nisur hetimet.
Njoftimi i policisë:
Identifikohen 12 shtetas të huaj, të fshehur në një kamion me rimorkio që dyshohet se janë kontrabanduar
Prishtinë, më 4 shkurt 2021
Me datë 04.02.2021, rreth orës 04:00, në linjën hyrëse të Republikës së Kosovës në Terminalin Doganor, Han i Elezit, nga Maqedonia e Veriut ka ardhur Kamioni ngjyrë e bardhë me rimorkio me ngjyrë hiri të cilën e drejtonte shtetasi m/s/RKS, me inicialet (A. N.), viti i lindjes (1983) nga Graçanica.
Nga ana e zyrtarëve policor mjeti është selektuar për kontroll me pajisje-kamera.
Gjatë kontrollimit kamera ka dhënë sinjale se në rimorkio mund të ketë të fshehur gjallesa. Pas sinjalizimit nga pajisja, Policia e Kosovës në bashkëpunim me Doganën e Kosovës ka këputur bllombën, është hapur rimorkio ku edhe janë gjetur dymbëdhjetë persona shtetas nga Afganistani.
Të gjithë personat janë kontrolluar nga ekipi mjekësor.
Në bashkëpunim me prokurorin kompetent janë duke u kryer hetime lidhur me dyshimet për kontrabandim me migrant, përderisa personat e identifikuar janë duke u trajtuar konform ligjit për të huaj në Republikën e Kosovës.
Top Channel
