Mbajtja e një maske prej cope nuk mjafton për të parandaluar përhapjen e koronavirusit, nëse nuk praktikohet distancimi shoqëror, sugjeron një studim i ri.
Studiuesit nga Universiteti Shtetëror i New Mexico, në Las Cruces shqyrtuan të paktën pesë lloje të ndryshme maskash të tilla. Ata panë se çdo material e reduktonte ndjeshëm nivelin e spërklave që përhapeshin. Por nëse personi përballë nuk është gati 2 metra larg, atëherë ai mund të thithë mjaftueshëm pikla sa për t’u infektuar.
“Maska ndihmon patjetër, por nëse njerëzit janë shumë pranë njëri-tjetrit, sërish ekziston shansi i përhapjes dhe infektimit nga koronavirusit”, tha bashkëautori i studimit, Dr Krishna Kota, profesor i asociuar në Universitetin Shtetëror të New Mexico-s.
Për të realizuar këtë studim të botuar në revistën Physics of Fluid, ekipi ndërtoi një pajisje që imiton kollën dhe tështimin e njerëzve. Ajo përdor një gjenerator ajri që pikla të imëta të lëngshme, të ngjashme me ato që dalin nga hunda apo goja e një personi. Makineria u testua në pesë lloje të ndryshme maskash: një maskë N95, një maskë kirurgjikale, një maskë pëlhure, një maskë pëlhure të trashë dhe një maskë pëlhure me dy shtresa.
Të gjitha i ndalonin piklat, por në masën 100% i bllokonte vetëm N95-sa. Maska e zakonshme e pëlhurës rezultoi në këtë drejtim, ajo që e ndalonte më pak përhapjen e sëmundjes, megjithatë nëse largësia ishte dy metra, edhe ajo mbronte nga virusi.
Top Channel
