Maqedonia e Veriut të hënën ka regjistruar 22 viktima me COVID-19 dhe 129 të infektuar që paraqet shifrën më të ulët në katër muajt e fundit, por kjo i referohet numrit të ulët të testeve të kryera në 24 orët e fundit. Ministria e Shëndetësisë ka raportuar për 591 persona të testuar, në laboratorët e institutit dhe dy laboratorët më të mëdhenj privat.

Për herë të parë numri më i madh i viktimave nuk është Shkupi ku janë regjistruar vetëm 3 të vdekur. Në Prilep janë shënuar 9 të vdekur, 2 në Strugë ndërsa nga 1 në tetë qytete tjera.

Sipas raportit, të hënën është regjistruar numër rekord i të shëruarve, gjithsej 1.122 persona apo gati dhjetë herë më shumë se numri i të infektuarve.

Në Maqedoninë e Veriut, që nga muaji mars, me COVID-19 janë të diagnostikuar 78.434 persona, prej tyre 2.314 persona e kanë humbur jetën, 55.155 janë shëruar ndërsa 20.965 janë shëruar.

Drejtuesit e institucioneve kanë apeluar për respektimin e masave shtrënguese që janë në fuqi; si mbyllja e objekteve të gastronomisë në orën 18.00, mos grumbullimi i më shumë se katër personave në ambiente publike, si dhe mos organizimi i manifestimeve në sheshet e qyteteve.

Qeveria e Maqedonisë së Veriut ka vendosur ndalimin e të gjitha fluturimeve nga Britania e Madhe, pas paraqitjes së një varianti të ri të koronavirusit.

Paraprakisht, Komisioni i Sëmundjeve Infektive ka dalë me rekomandimin për izolimin për 14 ditë të të gjithë personave që hyjnë në Maqedoninë e Veriut nga Britania e Madhe.

“Pas informacionit të fundit në lidhje me shfaqjen e variantit të ri të koronavirusit në Britaninë e Madhe, Shtabi i Krizës miratoi vendimin për t’i ndaluar të gjitha fluturimet nga Britania e Madhe drejt Maqedonisë së Veriut. Përveç kësaj, çdo person që arrin nga ky shtet, do t’i nënshtrohet një izolimi të detyrueshëm 14-ditor”, ka bërë të ditur kryeministri Zoran Zaev./REL/

Top Channel