Presidentja e Maqedonisë së Veriut, Gordana Siljanovska-Davkova, ka deklaruar se procesi i integrimit të vendit në Bashkimin Europian vijon të jetë i bllokuar për shkak të kërkesës së Bullgarisë që në Kushtetutën maqedonase të përfshihet edhe pakica bullgare, mes komuniteteve të tjera të njohura zyrtarisht.
Në një prononcim sot, në Samitin e Zgjerimit të Euronews, Siljanovska-Davkova u shpreh se Maqedonia e Veriut ka bërë vazhdimisht lëshime në nivel kushtetues për të ecur përpara në rrugën drejt integrimit europian. Megjithatë, sipas saj, çdo ndryshim i ri duhet të ketë edhe mbështetjen e qytetarëve.
“Ne jemi kampionë të ndryshimeve kushtetuese, e kemi ndryshuar Kushtetutën 26 herë dhe shumica e këtyre ndryshimeve na janë imponuar”, deklaroi presidentja.
Ajo nënvizoi se mandati dhe legjitimiteti i saj burojnë nga qytetarët, ndaj nuk mund të marrë përsipër të premtojë ndryshime të tjera kushtetuese pa pasur më parë mbështetjen e tyre.
“Legjitimiteti im buron nga qytetarët dhe u përket atyre. Atëherë, si mund t’ju premtoj se do ta ndryshojmë Kushtetutën?”, u shpreh Siljanovska-Davkova.
Ndryshimet kushtetuese, kusht për vijimin e negociatave me BE-në
Përfshirja e komunitetit bullgar në Kushtetutën e Maqedonisë së Veriut është një prej kushteve të kompromisit të arritur në vitin 2022, me ndërmjetësimin e Francës, për të zhbllokuar procesin e integrimit europian të vendit.
Në bazë të kësaj marrëveshjeje, Shkupi mori përsipër të ndryshonte Kushtetutën, duke përfshirë shprehimisht bullgarët në listën e komuniteteve të njohura zyrtarisht. Për miratimin e këtyre ndryshimeve nevojitet një shumicë prej dy të tretash në Kuvend, por qeveria aktuale nuk ka arritur të sigurojë votat e mjaftueshme.
Presidentja deklaroi se, sipas saj, rreth 80 për qind e qytetarëve janë kundër ndryshimeve të propozuara. Ajo bëri gjithashtu të ditur se nisma nuk ka kaluar ende as fazën e parë në Komisionin parlamentar për Çështje Kushtetuese.
Sipas Siljanovska-Davkovës, pengesat që po mbajnë pezull integrimin europian të vendit nuk lidhen me mungesën e reformave apo me mosplotësimin e kritereve të Bashkimit Europian, por me mungesën e vullnetit politik të vendeve fqinje.
Një rrugëtim i gjatë drejt BE-së, i shoqëruar me lëshime politike
Maqedonia e Veriut, me një popullsi prej rreth 1.8 milionë banorësh, paraqiti kërkesën për anëtarësim në Bashkimin Europian në vitin 2004, ndërsa një vit më vonë, në 2005-n, mori statusin e vendit kandidat. Që prej asaj kohe, rruga e saj drejt anëtarësimit është karakterizuar nga pengesa të vazhdueshme politike dhe mosmarrëveshje me shtetet fqinje.
Një prej zhvillimeve më të rëndësishme në këtë proces ishte marrëveshja e vitit 2018 me Greqinë. Përmes saj, vendi ndryshoi emrin nga Republika e Maqedonisë në Maqedonia e Veriut, duke i dhënë fund një konflikti diplomatik shumëvjeçar që kishte penguar aspiratat e tij për anëtarësim në NATO dhe Bashkimin Europian.
Duke iu referuar lëshimeve të bëra ndër vite, Siljanovska-Davkova ngriti pikëpyetje mbi kufijtë e kompromisit që duhet të bëjë një vend kandidat për të përmbushur kërkesat e shteteve fqinje, përpara se të ketë mundësi të avancojë drejt anëtarësimit në BE.
Koalicioni qeverisës i drejtuar nga konservatorët, i cili është në pushtet që nga mesi i vitit 2024, disponon një shumicë të konsiderueshme parlamentare. Megjithatë, kjo nuk ka qenë e mjaftueshme për të siguruar shumicën prej dy të tretash që nevojitet për miratimin e ndryshimeve kushtetuese.
Siljanovska-Davkova: Zgjidhja duhet të gjendet përmes dialogut
Pavarësisht mosmarrëveshjeve me Sofjen, presidentja maqedonase u shpreh se do të vijojë përpjekjet për të gjetur një zgjidhje përmes dialogut me përfaqësuesit politikë bullgarë.
Ajo tregoi se ka zhvilluar disa takime me ish-presidentë të Bullgarisë, si edhe me kryeministrin aktual të vendit, ku ka ngritur shqetësimet e saj për bllokimin e procesit të integrimit europian të Maqedonisë së Veriut.
“Jam takuar disa herë me presidentët e mëparshëm dhe me kryeministrin aktual. Kam shprehur të njëjtat ndjenja dhe të njëjtin shqetësim dhe do të vazhdoj ta bëj këtë, vetëm përmes dialogut”, deklaroi ajo.
Megjithatë, Siljanovska-Davkova shmangu akuzat e drejtpërdrejta ndaj Bullgarisë se po pengon qëllimisht anëtarësimin e Maqedonisë së Veriut në Bashkimin Europian.
Në vend të kësaj, ajo kërkoi më shumë pragmatizëm dhe vullnet politik nga vendet fqinje, në mënyrë që të tejkalohen mosmarrëveshjet ekzistuese dhe të mundësohet përparimi i vendit në procesin e integrimit europian.
Top Channel
