Një ngjarje tronditëse u shënua në Lezhë, ku pas mesnate, në zonën e njohur si Gajush u gjet i vrarë brenda makinës së tij një efektiv 26-vjeçar.
Xhuljano Prela po kthehej nga Tirana në drejtim të banesës së tij, në çastet kur iu bë pritë nga një automjet nga ku u qëllua tre herë; një prej plumbave e kapi të riun në trup dhe i shkaktoi vdekjen.
Familja e të ndjerit ka hapur dyert e mortit, ku jashtë kamerës, të afërmit shprehen për Top Channel se i riu nuk kishte konflikte me asnjë.
“Nuk ka qenë në shtëpi. Ishte në punë dhe pastaj do priste ca të njohur”, deklarojnë ata.
Xhuljano kishte dalë nga shtëpia e tij, sipas burimeve, pas një telefonate të marrë ndërsa në autostradë autorët e kanë ndaluar dhe i kanë nxjerrë pistoletën. 26-vjeçari sapo e ka konstatuar është munduar të largohet, por një plumb e ka kapur ne trup.
Automjeti i tij përfundoi në një parcelë aty pranë, gjë e cila bëri që në fillim kjo ngjarje të raportohej si një aksident. Gjatë kontrolleve në vendin e ngjarjes janë gjetur tre gëzhoja dhe një celular.
Prela, me origjinë nga Puka ishte student në Akademinë e Policisë Tiranë në vitin e 3-të. I ndjeri ka punuar dy vite në Komisariatin e Policisë Lezhë, ndërsa prej një viti ishte transferuar në FNSH-në Shkodër.
FNSH Shkodër dhe forcat speciale RENEA kanë ngritur pika kontrolli dhe po kontrollojnë zonën për shoqërimin e personave të dyshuar si autorë të ngjarjes apo që mund të kenë dijeni për ngjarjen.
Top Channel
