Këtu ndodhem në Durrës në lagjen numër 18, një nga zonat më të dëmtuara nga tërmeti i datës 26 nëntor të vitit të shkuar.
Siç mund të shihet, shumë apartamente dhe banesa u dëmtuan për shkak të lëkundjeve të tërmetit dhe kryesisht, katet e para dhe ato të dyta të pallateve janë ato të cilat morën dëmtimet më të mëdha.
Por ne do të shohim shtëpinë e njërit prej banorëve të kësaj zone, Avni Shelgu, i cili pretendon se 5 milionë lekë të vjetra të dhëna nga qeveria nuk mjaftojnë për riparimin e dëmeve të shkaktuara nga tërmeti.
“Kjo komplet duhet të shkatërrohet, me mure, me dysheme, me dyer dritare, do të dalë komplet jashtë. këtu do të ngeli vetëm sipërfaqja e tavanit dhe kollonat do të zhvishen komplet. Dhe unë nuk jam i kënaqur me këtë, sepse kjo shpëti nuk mbarohet me 5 milionë lekë. Dhe kemi një vit që presim. Rrimë të gjithë në një cep atje, në një zgëqe, bashkë me dy fëmijët. Bonuse qeraje keni marrë? Bonusin e kemi marrë, po nuk është problemi tek bonusi i qerasë, nuk e dua fare atë bonos”, tha ai.
Sipas Avniut, vlera për riparimin e dëmeve në shtëpinë e tij, është tre-fish më e lartë, se vlera e dhënë nga shteti.
“Unë kam bërë një vlerësim, kam marrë një inxhinier privatisht, e kam paguar dhe inxhinierin, që ta masë dhe ta shikojë. Kjo bën 15 milionë lek komplet. Komplet, me materiale me të gjitha”, tha ai.
Në apartamentin e tij, vihen re edhe kolonat e dëmtuara, të pallati prej pesë kateve.
“Komplet kolona këtu është e thyer. këtu janë këputur edhe hekurat. E gjithë kjo mban 5 katëshin. Kjo ka mbaruar”, tha ai.
Avni Shelgu, kërkon nga shteti, që të ngrihet një tjetër komision vlerësimi për dëmet që janë shkaktuar nga tërmeti në apartamentin e tij.
Top Channel
