Ali Ahmeti ftohet nga Gjykata Speciale në Hagë si dëshmitar

Njoftimi e bëri ai vetë përmes një postimi në Facebook. Ahmeti sqaroi se është ftuar në rolin e dëshmitarit, por nuk bëri të ditur se kur do të udhëtojë drejt Hagës.

“Sundimi i ligjit dhe arritja e drejtësisë së mirëfilltë joselektive, vendore dhe ndërkombëtare janë synim dhe detyrim i imi i përhershëm në të gjithë veprimtarinë time. Ndaj, ju njoftoj se Dhomat e Specializuara të Republikës së Kosovës, përkatësisht Prokuroria Speciale e Kosovës, si një nga themeluesit e Ushtrisë Çlirimtare të Kosovës dhe anëtar i shtabit të përgjithshëm, më ka ftuar në cilësinë e dëshmitarit dhe e kam pranuar ftesën e kam vendosur kontakt konstruktiv dhe bashkëpunues me zyrtarët në Hagë”, ka shkruar mes tjerash Ahmeti.

Dhomat e Specializuara në Hagë u formuan pas një raporti të Këshillit të Europës, të vitit 2011, në të cilin senatori zviceran, Dick Marty, ka folur për krime të pretenduara “të pjesëtarëve të Ushtrisë Çlirimtare të Kosovës ndaj pakicave etnike dhe rivalëve politikë“, nga janari i vitit 1998 e deri në dhjetor të vitit 2000. Prokurorët në Hagë kanë intervistuar deri më tani qindra ish-pjesëtarë të UÇK-së.

Javën e kaluar, në Hagë u intervista edhe presidenti i Kosovës, Hashim Thaçi, i thirrur pasi Zyra e Prokurorit të Specializuar paraqiti një aktakuzë për krime lufte dhe krime kundër njerëzimit kundër tijt, kryetarit të Partisë Demokratike të Kosovës, Kadri Veseli, si dhe disa të tjerëve, emrat e të cilëve nuk janë bërë publikë.

Top Channel