Kompania turke, Atlas Global ka nënshkruar dokumentet për falimentim, pasi “dështoi të vazhdonte veprimtarinë”, ka njoftuar Autoriteti i Aviacionit Civil në Turqi.

Kjo kompani ka ndalur të gjitha fluturimet, thanë drejtues të Autoritetit por pa dhënë detaje tjera. Vetë Atlas nuk ka bërë ende asnjë koment mbi këtë situatë. Mësohet se kompania është  përballur me vështirësi financiare dhe i kishte pezulluar të gjitha fluturimet nëntorin e vitit të kaluar.

Disa prej tyre megjithatë u realizuan pas 21 dhjetorit. Këtë javë, mediat turke kanë raportuar se falimentimi ka ndodhur menjëherë, duke cituar shpenzimet e mëdha pasi mori përsipër fluturimet në Aeroportin e Stambollit.

Atlas Global ka realizuar një varg fluturimesh të brendshme dhe ndërkombëtare, duke përfshirë ato në Gjermani, Rusi, Kazakistan dhe Emiratet e Bashkuara Arabe. Sipas faqes së kompanisë, ajo ka pasur 25 avionë për pasagjerë.

Top Channel