Puigdemont merr arratinë, do të kërkojë azil në Bruksel?

I njëjti burim tha se Puigdemont do të mbajë një konferencë për shtyp në Bruksel gjatë mesditës së të martës.

Ndërkohë, burime nga qeveria katalanase kanë thënë këtë të hënë për rrjetin lokal televiziv “TV3” se Puigdemont ndodhej “në një vend të fshehtë por të sigurtë” në Bruksel, të njëjtën ditë kur kryeprokurori spanjoll ngriti akuzat kundër tij për rebelim.

Puigdemont ndodhet në kryeqytetin belg së bashku me anëtarët e tjerë të kabinetit, për t’u takuar me politikanët nacionalistë fleming, e planifikon që të kërkojë edhe azil politik, sipas njoftimeve të rrjetit televiziv spanjoll “La Sexta”.

Sekretari belg për Politikat e Azilit dhe Emigracionit, Theo Francken tha të shtunën se Puigdemont mund të kërkonte azil politik në Belgjikë.

Përfaqësuesit katalanas në BE nuk kanë komentuar ende mbi raportet se Puigdemont ndodhej në Bruksel, sikurse nuk kanë dhënë shpjegime as zyra e kryeministrit të Belgjikës, apo zyrtarë të tjerë belgë.

Një zëdhënës i nacionalistëve fleming të partisë “N-VA”, Joachim Pohlmann tha për “Politico”-n se “nëse Puigdemont ndodhet në Bruksel, me siguri nuk është atje me ftesën e N-VA”.

Një zëdhënës i Komisionit Europian, tha se KE nuk është në dijeni nëse Puigdemont është realisht apo jo në Bruksel, madje shtoi se nuk ka asnjë takim në axhendë me ish-presidentin e Katalonjës.

Ndërkohë, koordinatori i përgjithshëm i Partisë Popullore të kryeministrit Mariano Rajoy, Fernando Martinez-Maillo e përshkroi vizitën e raportuar të Puigdemontit në Bruksel “nga dëshpërimi”.

“Sa i përket vizitës së Puigdemontit në Bruksel, që ende nuk është konfirmuar, besoj se do të jetë prova reale dhe më absolute e dëshpërimit të tij”, tha ai. “Fakti që ai shkon në Bruksel, selinë e institucioneve europiane, teksa një prej vlerave më të mëdha të BE-së është mbrojtja e sundimit të ligjit, mbrojtja e ligjshmërisë dhe e vlerave kushtetuese, është në vetvete një kontradiktë. Do të ishte më mirë që ai të qëndronte në shtëpi”.

Top Channel