Indi, shpërthen dhuna pas dënimit të gurusë abuzues. 25 viktima

Ushtria indiane u mobilizua në qytetin Panchkula të premten, pak pasi gjykata shpalli fajtor për sulme seksuale udhëheqësin shpirtëror Ram Rahim Singh.

Masa e dënimit për të vetëquajturin “njeriu i Zotit” dhe udhëheqësin e një sekti të njohur në vend do të jepet të hënën.

Energjia elektrike, shërbimi “Wi-Fi” dhe televizionet kabllore u ndërprenë pjesërisht në shtetet Haryana dhe Punjab përpara vendimit, ndërsa 200 mijë pjesëtarë të sektit u mblodhën në Panchkula, për t’u solidarizuar me gurunë.

Pamjet televizive treguan kolonat e tymit teksa ngriheshin nga një stacion hekurudhor dhe një pike karburanti në Punjab, të cilës iu vu flaka nga mbështetësit e gurusë. Gjendja e shtetrrethimit u shpall në 3 prej qyteteve më të mëdha të këtij shteti, ku u raportuan qindra incidente të dhunshme.

Ekipet e shumë medieve raportuan plagosje apo dëmtime të automjeteve të tyre. Policia përdori gaz lotsjellës dhe topa uji për të larguar manifetuesit. Kryeqyteti i Indisë, Nju Delhi është gjithashtu në gjendje alarmi, pasi u raportuan të paktën 7 raste zjarrvënieje në zona të ndryshme.

Singh, një prej njerëzve më të pushtetshëm në Indi, e drejton sektin 69-vjeçar nga ashrami i tij, që gjendet në një pronë prej 1.000 hektarësh në Harajana, ku përfshihet një hotel, kinema, stadium kriketi dhe shkolla. Ai pretenton se ka 60 milionë ndjekës në të gjithë botën.

Top Channel