Njohës të së Drejtës Penale Ndërkombëtare në Kosovës paralajmërojnë se procedurat gjyqësore për rastin “Haradinaj” në Francë mund të mos përfundojnë në datën 2 mars, por të vazhdojë më tej.
Profesori Ismet Salihu, nga kjo fushë, thotë se kjo çështje mund të shtyhet derisa gjykata, e më pas Ministria e Drejtësisë në Francë, të marrin vendim sesi do të veprohet në bazë të administrimit të provave, në një prononcim për “Radion Evropa e Lirë”.
“Ekziston rreziku që procesi të mund të zvarritet më tej, për shkak se organet kompetente në Francë, duke nisur nga gjykatat, duhet të shqyrtojnë qëndrueshmërinë, vlefshmërinë dhe vërtetësinë e provave që ka paraqitur Serbia. E për vlerësimin e tyre mendoj se duhet kohë”, thotë ai.
“Sigurisht që Serbia ka paraqitur shumë prova. Kështu që kjo çështje mund të përmbyllet më 2 mars, e përpara kësaj date kurrsesi. Por edhe mund të shtyhet”, tha më tej Salihu.
Profesori Salihu thotë se rastet e tilla kërkojnë kohë, derisa mekanizmat përkatëse të drejtësisë të binden që provat e dorëzuara nuk janë të besueshme.
“Serbia i ka vlerësuar dhe i ka paraqitur provat. Tashmë Franca duhet të bindet dhe të konstatojë se këto prova qëndrojnë vërtet ose jo. Fakti që është caktuar seanca më 2 mars nuk do të thotë domosdoshmërisht se kjo kërkesë do të zgjidhet me një po ose një jo”, tha Salihu.
Ndërkohë, analisti politik Driton Selmanaj mendon se, vonesa e mëtejshme e një vendimi në institucionet e drejtësisë në Francë për Haradinajn nxit dyshime të tjera, përtej çështjeve juridike.
“Zgjatja e vendimmarrjes për Haradinajn nxit dilema. A mund të jetë ndonjë veprim që mund të lidhet edhe me Gjykatën Speciale, kjo ndoshta është herët të thuhet, por këtu gjithçka duket e paqartë dhe ka dilema. Them se zgjatja e mëtejshme nxit dyshime rreth asaj nëse është një proces i pastër, krejtësisht juridik, apo ka diçka tjetër përtej kësaj”, tha Selmanaj.
Kryetari i Aleancës për Ardhmërinë e Kosovës, Ramush Haradinaj u ndalua nga autoritetet franceze më 4 janar në Aeroportin e Bazelit, në bazë të një fletarresti të lëshuar nga autoritetet e Serbisë, që daton nga viti 2004. Haradinaj ishte komandant i lartë i Ushtrisë Çlirimtare të Kosovës dhe, pas luftës, themelues i AAK-së, një parti parlamentare që e udhëheq ende.
Top Channel
