Ashtu si çdo vit, edhe këtë herë qindra vetë mbushën plazhin ikonë brazilian të Copacabanës për t’iu lutur Yemanjas, perëndeshës afro-braziliane të detit.
Ndjekësit e besimeve “Candomble” dhe “Umbanda” e kanë traditë veshjen me të bardha për adhurimin e Yemanjas, një ritual ky që shoqërohet me këngë e kërcime rreth statujës së saj të vendosur në plazh.
Njerëzit ofrojnë lule, letra dhe produkte kozmetike, si dhurata për perëndeshën, me bindjen e plotë se hyjnesha do ta shpërblejë gjestin e tyre me një bekim. Dhuratat vendosen brenda disa varkave të vogla që lëshohen pastaj në oqean.
Yemanja konsiderohet njëkohësisht mbrojtëse e peshkatarëve dhe e të mbijetuarve nga mbytja.
Megjithatë, organizatorët e ceremonisë u kanë kërkuar besimtarëve të shmangin ndotjen e ujit me shishe dhe objekte të tjera plastike. Për këtë qëllim, edhe varkat e përdorura prej tyre prodhohen zakonisht me materiale natyrore.
Të devotshmit derdhin gjithashtu edhe verë e shampanjë mbi figurën e Yemanjas, por edhe në këtë rast duhet të kujdesen që të mos lënë shishet boshe nëpër plazh. Adhuruesit e hyjneshës shpresojnë qe “orisha”, apo shpirti i saj, të sjellë një Vit të Ri më të begatë e më paqësor.
Top Channel
