Trump, vizitë në “syrin e ciklonit”. Do të takohet me presidentin meksikan

Vizita vjen me ftesë të këtij të fundit, i cili të njëjtën gjë ka bërë edhe me kandidaten demokrate në Presidencialet e nëntorit, Hillary Clinton. Trumpi shkroi në “Twitter” se po e pret takimin me padurim, ndërsa Pena Nieto theksoi se dialogu do të ndihmojnë në mbrojtjen e meksikanëve, “kudo që ata të jenë”.

Miliarderi njujorkez i ka fshikulluar ashpër emigrantët meksikanë në komentet e tij. Deklarata se do të ngrejë një mur mes dy vendeve, nëse merr çelësat e Shtëpisë së Bardhë, shkaktoi një valë të menjëhershme kritikash dhe indinjatë.

Që prej konventave partiake të muajit të kaluar, sondazhet e opinionit tregojnë një rënie të mbështetjes për republikanët. Si në nivel kombëtar, ashtu edhe në shtetet kyçe, për sa i takon zgjedhjeve Trump renditet pas Hillary Clintonit, që gëzon përkrahje të madhe sidomos në radhët e minoriteteve.

Vizita e tij në Meksikë është një lëvizje e guximshme, që tregon vullnetin për t’u përballur me një komb, të cilin e ka vënë në lojë. Edhe pse takimi me presidentin meksikan mendohet se do të jetë mjaft i kontrolluar, ekziston gjithmonë rreziku që Trumpi të thotë apo bëjë diçka polemizuese.

Nga ana tjetër, njerëzit që e mbështetën kur i quajti përdhunues e trafikantë droge emigrantët meksikanë, mund ta shohin këtë ndalesë si afrim me armikun. Ndërkohë, edhe Pena Nieto nuk e ka lënë më parë pa thumbuar kandidatin republikan, të cilin e ka akuzuar për dëmtim të marrëdhënieve amerikano-meksikane, ndërsa retorikat e republikanit i ka krahasuar me ato të udhëheqësit nazist, Adolf Hitler.

Top Channel