Presidenti turk Recep Tayyip Erdogan ka deklaruar se Amerika është zbuluar nga marinarë myslimanë që në shekullin XII dhe jo nga Cristoforo Colombo në 1492.
Këtë deklaratë Erdogan e ka bërë në Samitin e parë të liderëve myslimanë të Amerikës Latine, zhvilluar në Stamboll.
“Në ditaret e tij Cristoforo Colombo i është referuar pranisë së një xhamie në majën e një mali në Kubë”, tha Erdogan.
Presidenti turk, partia e të cilit bazohet në politikën islame, shprehu dëshirën për të rindërtuar një xhami në vendin ku sipas tij e gjeti Colombo dhe për këtë njoftoi se do të zhvillojë bisedime me Kubën.
“Kontaktet mes Amerikës Latine dhe Islamit datojnë që në shekullin XII”, tha më tej Erdogan, duke i dhënë kredite teorisë së tij dhe jo asaj të njohur botërisht.
Botërisht besohet se Colombo e zbuloi Amerikën në vitin 1492, teksa me ekuipazhin e tij përpiqej të gjente një rrugë të re për në Indi.
Por në një artikull të publikuar në vitin 1996, hostoriani Youssef Mroueh thoshte se, hyrja e lundrimtarit gjenovez ishte provë se myslimanët e kishin arritur Amerikën më parë dhe se feja islame ishte e përhapur.
Megjithatë, deri më sot në Amerikë nuk është gjetur asnjë strukturë islamike që të datojë para periudhës së Colombo.
Top Channel
