Është përkujtuar në Shkodër demonstrata e 2 Prillit e vitit 1991, ku mbetën të vrarë katër dëshmorët e demokracisë në revoltën popullore kundër regjimit komunist.
Të pranishëm në këtë cermoni ishte kryetari i Partisë Demokratike Lulzim Basha, ish-kryetarja e Parlamentit Jozefina Topalli, familjarë të katër dëshmorëve dhe drejtues të pushtetit vendor. Ceremonia përkujtimore nisi me vendosjen e kurorave me lule pranë memorialit.
“Vrasja e tyre në demonstratën e 2 Prillit ka dhembur dhe ka indinjuar më shumë sepse u vranë në befasi, prapa shpine, nga burracakëria dhe anti-shqiptarizmi”, deklaroi Basha.
Ndërsa deputetja e Shkodrës, Jozefina Topalli u shpreh se kjo është një ditë për të reflektuar, pasi vetëm protestat mund ta nxjerrin vendin nga mjerimi ku është futur dhe pasiguria e tritoleve.
“Sot më shumë se kurrë, kur politika e një dysheje oligarkësh është instaluar në vend, shqiptarët duhet të reflektojnë thellë për të reaguar ndaj varfërisë e mjerimit, por mbi të gjitha për të ardhmen e fëmijëve të tyre dhe vendit tonë. Vetëm në këtë mënyrë ne mund të mbajmë premtimin për të cilin lindi PD”, tha Topalli.
Aktivitetet përkujtimore për 2 Prillin kanë vazhduar në teatrin “Migjeni” të Shkodrës dhe me vizita tek familjet e dëshmorëve të rënë.
Top Channel
