Qeveria do të rrisë huamarrjen

Rënia e fortë e të ardhurave por edhe shpenzimet e larta të Qeverisë së kaluar i kanë nxjerr shumë nga treguesit e buxhetit të shtetit jashtë kufijve ligjor. Në tetë muajt e parë të vitit të ardhurat nga taksat dhe burimet e tjera ishin sipas Ministrisë së Financave 16.3 miliardë lekë më pak se plani.

Deri në fund të vitit ekspertët e ministrisë përllogarisin se mosrealizimi mund të arrijë në rreth 35 miliardë lekë, për shkak të uljes së taksave efekti i të cilave ka filluar në gjashtëmujorin e dytë të vitit.

Për të rregulluar llogaritë e shthurura, Qeveria do i paraqesë në tetor Parlamentit draftin e rishikuar të buxhetit. Top Channel ka mësuar se ndryshimet janë një kombinim i shkurtimit të shpenzimeve dhe rritjes së huamarrjes.

Në draftin fillestar të buxhetit, huamarrja e Qeverisë për këtë vit ishte parashikuar në 49 miliardë lekë ose 3.4 për qind e Prodhimit Kombëtar. Me ndryshimet e reja pritet që shifra të shkojë në 59 miliardë lekë ose mbi 4 për qind e Prodhimit Kombëtar.

Në gjysmën e parë të vitit Qeveria e kaluar arkëtoi 12 miliardë lekë nga shitja e katër hidrocentraleve tek kompania “Kurum”. Por paratë u përdorën për të rritur shpenzimet para zgjedhjeve dhe jo për të mbajtur nën kontroll treguesit e buxhetit.

Tashmë me ndryshimet e reja, Shqipëria shkel sërish kufirin e deficitit buxhetor, për të disatin vit rresht. Një situatë që ka çuar në rritjen e përvitshme të borxhit publik, drejt niveleve sipas FMN dhe Bankës Botërore të rrezikshme për ekonominë.   

Top Channel