“Turnet” për të marrë fëmijët nga shkolla

Por, si menaxhohet koha kur përveç punës, familja ka dhe fëmijë në shkolla që duhet t’i çojë dhe t’i marrë? Cila është zgjidhja më e përshtatshme? Ndriçim dhe Violeta Zyla kanë dy djem në shkollën 9-vjeçare “Vasil Shanto” në Tiranë. Ai punon gjithë ditën tek Tregu Elektrik si tregtar, ndërsa  ajo si shitëse orendish shtëpiake. Dita e tyre është shumë e ngarkuar. Cdo mëngjes, dy djemtë, Ledio dhe Frajdi Zyla, bëhen gati për në shkollë ku shoqërohen nga kryefamiljari.

“Në mëngjes i çoj unë, ndërsa në drekë i merr nusja. Njëri nga ne duhet të lërë punën rreth 1 orë për t’i marrë”, thotë Ndriçimi.

Koha nuk është kurrë e mjaftueshme për shkak të biznesit që Ndriçimi drejton, por familja vjen gjithmonë në plan të parë. Shpesh herë ai sakrifikon ditën për të marrë fëmijët nga shkolla.

Kur përfundon ora e fundit e mësimit, në ditët që ai e ka të pamundur të shkojë në shkollë, atëherë bashkëshortja lë punën e saj: “Mundohem të mbyll punët e të marr fëmijët.”

Për momentin, familja është duke e përballuar me “turne” midis burrit dhe gruas marrjen e fëmijëve nga shkolla, por të dy e pranojnë që kjo është mjaft e vështirë dhe e lodhshme.

“Puna ime është 8:00 me 17:00. Duhet të çoj një nga djemtë në orën 12:00 e pastaj ta marr në orën 15:00. Edhe trafiku të pengon, por sakrifikojmë”, thekson Violeta.

Koordinimi mes bashkëshortëve është vetëm një zgjidhje, por cilat mund të jenë disa alternativa të tjera? Punësimi i një gruaje për ta marrë fëmijën pas shkolle e më pas për ta dërguar në kopsht për disa orë deri sa prindërit të përfundojnë punë është një mundësi. Abonimi i prindërve në kompani taksie për ta marrë fëmijën nga shkolla në momentin që del ose vënia në dispozicion e një furgoni shihet si zgjidhje tjetër e mundshme.

E fundit, por jo më e parëndësishmja, mbetet varianti i punësimit të dados për ta marrë fëmijën nga shkolla, kjo në rastin kur gjyshja nuk jeton me familjen, për t’i pritur dhe dërguar ajo nipat dhe mbesat.

Top Channel