Ish-shefi i skuadrës Renault, në të cilën Alonso fitoi dy Botërore, Flavio Briatore, përjashtoi çdo mundësi që spanjolli të braktisë Ferrarin për të kaluar në timonin e Red Bullit në sezonin e ardhshëm.
“Fernando Alonso do të vazhdojë tek Ferrari. Ai ka një kontratë dhe kontratat duhet të respektohen. Nuk ka asnjë tundim për të shkuar tek Red Bulli, jam i sigurt për këtë”, deklaroi Britatore, për të përditshmen sportive italiane “La Gazzetta dello Sport”.
Briatore pranoi se niveli aktual i “kokëkuqes” nuk është ai i shpresuari, por sipas tij, kjo nuk do të thotë se Alonso do të largohet. “Është normale që një pilot të dëshirojë të garojë me një makinë të shpejtë, por ai duhet që gjithashtu të punojë për ta arritur këtë. E vërteta është se Alonso nuk ka thënë kurrë që dëshiron të largohet dhe unë kam besim që dyshja Ferrari-Alonso do të rezultojë shumë shpejt një dyshe fituese”.
Duke bërë një paralelizëm me kohën kur Alonso drejtonte një Renault, Briatore tha: “Fernando ka nevojë për një makinë që ta lejojë të nisen nga dy rreshtat e parë në garë. Në Hungari e dija që për të do të ishte e vështirë, siç ka qenë gjithmonë edhe kur ishte tek ne, por në Maranello duhet të gjejnë sa më shpejt një mënyrë për të përmirësuar makinën”.
Top Channel
