Bota

Alarmi, gripi i shpendëve i reziston mjekimeve

28/05/2013 16:05

Autoritetet mjekësore botërore janë vendosur në alarm nga mësimi i lajmit se gripi tepër i rrezikshëm i shpendëve, që i ka kushtuar jetën deri tani dhjetëra kinezëve gjatë 2013-s, ka fituar imunitet ndaj mjekimeve që përdoren për ta luftuar.

Një spital në Shangai, kryeqendra ekonomike e Kinës, informoi se midis 14 pacientëve të shtruar në spital për shkak të prekjes nga virusi “H7N9”, tre prej tyre nuk tregojnë më asnjë shenjë përmirësimi nga trajtimi me “Tamiflu”, ilaçi i vetëm i përdorur deri më tani kundër këtij virusi.

Sipas specialistëve, një zhvillim i tillë është tejet shqetësues, ndërsa redukton dukshëm shanset e të prekurve për mbijetesë.

Megjithatë, lajmi i mirë është se përfundimisht, duket se frika për një përhapje të virusit në një shkallë epidemike është shuar, pasi prej dy javësh nuk është regjistruar më asnjë rast i ri i prekur nga virusi i shpendëve.

”H7N9” është një variant i virusit të rrezikshëm “H5N1”, i njohur më mirë me emrin “SARS”, i cili i kushtoi jetën rreth 600 kinezëve pasi u përhap në fillim të viteve 2000.

”H7N9” ka pasur 131 raste të konfirmuara deri tani dhe 36 prej të prekurve nga virusi kanë ndërruar jetë.

Top Channel