Meta: Duhet qeveri e përgjegjshme

Prej kohësh klasa politike shqiptare, nënvizoi Meta, është futur në një spirale “konfliktualiteti” dhe vendi po vuan mungesën e bashkëpunimit mes palëve për të ndërmarrë reformat e nevojshme për zhvillimin e vendt.

“Shqiptarët janë lodhur nga retorikat politike që mbajnë ndezur debate shtërpe dhe që nuk ofrojnë asnjë zgjidhje për hallet dhe shqetësimet e përditshme të qytetarëve, duke lënë kështu në baltë axhendën e punësimit, zhvillimit dhe të integrimit europian. Vendit i duhet një qeveri e përgjegjshme, jo një Parlament e një maxhorancë që heton për veshin, por që nuk ia vë veshin halleve të njerëzve, që nuk dëgjon zërin e qytetarëve për të kapërcyer ngërçin e integrimit duke mos miratuar ligjet”, deklaroi Meta.

Shqipëria e shekullit 21, deklaroi kreu i LSI, nuk mund të ecë në dy korsi të ndryshme me dy shpejtësi të ndryshme, konkretisht në korsinë imagjinare të qeverisë ku shqiptarët duhet të jenë populli më i lumtur në botë dhe në korsinë e vërtetë.

“Kryeministri edhe kur flet për ekonominë është jashtë realitet shqiptar, duke përshkruar një realitet rozë, një ekonomi që shkëlqen dhe të krahasueshme me ekonominë gjermane. Të gjithë e kuptojnë që nuk mund të hapim vende të reja pune, nuk mund të kemi zhvillim apo mirëqënie kur ekonomia rritet vetëm me 1% të GDP-së, sepse edhe kjo rritje shkon tek një pakicë fatlume që është pranë pushtetit dhe jo tek qytetari i thjeshtë”, theksoi Meta.

Top Channel