Rënia e interesave te borxhit

Në mars të vitit 2010, pas një hetimi të thelluar në tregun e letrave me vlerë, Autoriteti i Konkurrencës deklaroi se Banka e Shqipërisë kishte rritur barrierat për pjesëmarrjen në ankandet e bonove duke kufizuar konkurrencën. Në atë kohë Autoriteti kërkoi menjëherë liberalizimin e tregut duke rekomanduar dhe një sërë masash konkrete.

Por edhe pas hetimit, tregu i letrave me vlerë vijoi të mbetej i ngurtë, deri në fillim të vitit të kaluar, kur disa banka me kapital të huaj në Shqipëri ndaluan kreditimin e Qeverisë. E gjendur në vështirësi për të financuar borxhin, Qeveria u detyrua të hapte tregun për indvidët. Fillimisht përmes hapjes së postës për ankandet dhe më vonë duke rritur kufirin e pjesmarrjes së individëve nga 20 në 50 për qind.

Paralelisht, për herë të parë, vitin e kaluar, Ministria e Financave nisi një fushatë të gjerë publicitare, masa këto që autoriteti i kishte sugjeruar vite më parë. Rezultatet ishin të menjehërshme. Pesha e individëve dhe biznesit në borxhin publik, vitin e kaluar shënoi rritjen më të lartë historike duke arritur në 20.5 për qind të totalit, ndërsa ajo e bankave private u ul për herë të parë.  

Hapja e imponuar e tregut solli rënien e menjehërshme të interesave. Norma mesatare e për bonot tremujore ra nga 5.81 për qind në vitin 2010 në 5.17 për qind, ndërsa ajo e bonove njëvjecare nga 8 u ul në 7 për qind.  
Interesat kanë vazhduar të bien edhe këtë vit duke cekur për bonot njëvjecare 6.21 për qind, një nga nivelet më të ulëta historike. Një pjesë e kësaj rënieje lidhet edhe me faktorë të tjerë, si inflacioni i ulët apo likuiditeti i lartë në sistem. Por në masën më të madhe, ajo që ndodhi me bonot e thesarit, tregon se qytetarët paguajne shtrenjtë për tregjet e kontrolluara, një fenomen ky jo i izoluar në ekonominë shqiptare siç kanë faktuar dhe vetë hetimet e Autoritetit.

Top Channel