Greva, vëmendje edhe në Bruksel

TCH: Në Shqipëri po zhvillohet prej më shumë se dy javësh një grevë urie e ish-të burgosurve politikë gjatë regjimit komunist. A është Komisioni në dijeni të kësaj?

Peter Stano: “Sigurisht që Komisioni është në dijeni të asaj që po ndodh në Shqipëri dhe ne po ndjekim ngjarjet sigurisht nga shumë pranë, si dhe dimë shumë mirë se çfarë ndodh çdo ditë, pasi siç e dini, Shqipëria është një partnere në proçesin e integrimit dhe për ne është e rëndësishme të dimë çdo gjë që lëviz në shoqërinë e vendit. Dhe ne po e ndjekim sigurisht”.

TCH: Në 12 prioritetet e Komisionit Europian, njëri është kthimi dhe kompensimi i pronave ndaj personave që u privuan nga kjo e drejtë gjatë komunizmit. Ish-të burgosurit në atë regjim u privuan nga liritë dhe të drejtat e tyre, ndërsa tashmë kërkojnë vetëm të drejtat bazë ekonomike. A ka ndonjë kërkesë Komisioni ndaj autoriteteve shqiptare lidhur me këtë?

Peter Stano: “Këto çështje janë shumë të rëndësishme. Është shumë e rëndësishme që të merren me çështjen e kompensimit të personave që u persekutuan politikisht gjatë regjimit të kaluar dhe ne inkurajojmë autoritetet shqiptare të zbatojnë plotësisht dhe pa pengesa legjislacionin e duhur për kompensimin e këtyre personave. Ka ligje për këtë gjë dhe ajo që po themi është se kjo temë është shumë serioze dhe shumë e rëndësishme, së bashku me çështjet që lidhen me kompensimin dhe kujdesin ndaj personave të persekutuar gjatë regjimit të shkuar për motive politike. Kjo duhet të bëhet nëpërmjet një kuadri demokratik dhe ligjor. Prandaj po inkurajojmë autoritetet shqiptare të zbatojnë plotësisht dhe pa vonesa ligjet që merren me kompensimin e këtyre personave”.

TCH: Një prej grevistëve u dogj rëndë sot gjatë një tentive për vetëflijim…

Peter Stano: “Po, jemi në dijeni të kësaj ngjarjeje që po e ndjekim. Kjo është një ngjarje shumë fatkeqe dhe i shprehim keqardhjen tonë familjes së personit në fjalë dhe ne shpresojmë në përmirësimin e shpejtë të gjendjes së tij shëndetësore”.

Bruksel: Arta Tozaj

Top Channel