“The Economist”, për Kosovën
29/12/2011 02:32
Analiza/ Kosova në tellallët rusë dhe nevoja për strategji efikase 24/11 18:35
Në shkrimin me titull “Shtetet e pavarësisë”, shkruar nga Tim Xhudah, revista “The Economist” e Londrës përmes një episodi interesant mes dy kryediplomatëve të dy shteteve të reja të botës, Kosovës dhe Nagorni Karabakut, ilustron vështirësitë në real politikën e marrëdhënieve ndërkombëtare, vecanërisht kur bëhet fjalë për shtete të vogla.
Duke cituar Ministrin e Jashtëm të shtetit të Nagorni Karabakut kryesisht me popullsi armene në shtetin e Axerbajxhanit, sipas të cilit vendi i tij do të njihte Kosovën, nëse Kosova do të bënte të njëjtën gjë për shtetin e tij, “The Economist” shkruan se mesazhi i kaluar homologut të tij kosovar Enver Hoxhaj nuk u pranua nga ky i fundit duke u refuzuar me politesë e diplomaci.
Dallimi mes dy shteteve është se asnjë shtet nuk e ka njohur Nagorni Karabakun, ndërkohë Kosovën e kanë njohur më shumë se 80 vende.
Perëndimi mendon se Kosova nuk është një precedent për vendet e tjera.
Duke shkruar për standarte të caktuara diplomatike “The Economist” e Londrës , analizon se Rusia një aleate e Serbisë nuk e njeh pavarësinë e Kosovës, por ndryshe nga vendet perëndimore njeh shtetet e Abkazisë dhe Osetisë pas luftës me Gjeorgjinë në 2008. Serbia mund të dojë të ketë kauzë të përbashkët me Gjeorgjinë, por nuk dëshiron të irritojë Rusinë. Po ashtu Gjeorgjia nuk dëshiron të bashkëpunojë me Serbinë për shkak të dëmit potencial në marrëdhëniet e saj me Shtetet e Bashkuara.
Në të njëjtën linjë armenët janë detyruar të përdorin argumente të pakuptimta për mosnjohjen e Kosovës me qëllim që të mos armiqësojnë padronët rusë. Armenia në fakt nuk e ka njohur Nagorni-Karabakun pasi kjo do u kujtonte diplomatëve amerikanë kur vinjë për vizitë që t’i kërkojnë të njohin Kosovën.
Duke i’u rikthyer Ministrit të Jashtëm kosovar Enver Hoxhaj, mesazhi i tij për homologun nga Nagorni- Karabaku është se Kosova mund të ketë marrëdhënie zyrtare vetëm me anëtarë të OKB-së edhe pse vetë Kosova nuk është futur ende në OKB, shkruan “The Economist”.
Njëlloj si armenët që simpatizojnë kosovarët, por nuk duan të zemërojnë rusët, edhe kosovarët nuk duan të irritojnë mbështetësit e tyre perëndimorë.
Duke konkluduar, analisti i njohur britanik i cështjeve ballkanike Tim Xhudah, në “The Economist” të Londrës thekson se të tilla janë themelet e diplomacisë në fushën e minuar të marrëdhënieve ndërkombëtare, ku shteteve dhe vendeve të vogla u duhet të manovrojnë për të garantuar mbrotjen sa më mirë të interesave të tyre.
Top Channel
