Siri, opozita kërkon ndërhyrje urgjente nga OKB

21/12/2011 00:00

Opozita siriane kërkon një mbledhje urgjente të Këshillit të Sigurimit të Kombeve të Bashkuara dhe Ligës Arabe për të diskutuar intensifikimin e dhunës, në veri-perëndim të Sirisë.

Këshilli Kombëtar Sirian tha se prej të hënës janë vrarë 250 persona.Vala e fundit e dhunës po zhvillohet në Xhabal Al Zauija, jo shumë larg kufirit me Turqinë.

Konkretikisht, Këshilli Kombëtar i kërkon Këshillit të Sigurimit të shpallë “zonë të mbrojtur”, rajonet që janë nën sulmin e ushtrisë. Por thirrja për të mbrojtur popullin i drejtohet edhe Ligës Arabe.
 
Franca-anëtare e përhershme në Këshillin e Sigurimit mbështeti thirrjen për veprim. Zëdhënësi i Ministrisë së Jashtme franceze, Bernard Valero tha se u krye një masakër e paprecedentë të martën.
“Është urgjente që Këshilli i Sigurimit të publikojë një rezolutë që bën thirrje për fundin e dhunës”.

Sipas raportimeve, përforcime të ushtrisë janë nisur drejt provincës së Idlibit ku po zhvillohet një betejë e vërtetë mes ushtrisë dhe dezertorëve.

Korrespondenti i BBC-së, që po i ndjek zhvillimet nga Libani, vendi fqinj, tha se përshkallëzimi i dhunës nuk është një koicindencë. Sipas tij, autoritetet siriane po pastrojnë cfarë mundin përpara mbërritjes së vëzhguesve. Vëzhguesit e Ligës Arabe pritet të mbërrijnë në Siri të enjten.

Organizata e Kombeve të Bashkuara tha se mbi 5000 persona u vranë në të gjithë Sirinë, prej nisjes së protestave kundër Bashar Al Asadit në muajin Mars.

Top Channel