Urimet e politikanëve

Këto vizita dhe urime vënë gjithmonë në dukje një nga virtytet më të mira të shqiptarëve: harmoninë dhe tolerancën fetare.

“Është dita e sakrificës njerëzore për paqen, për dashurinë dhe harmoninë. Ky është mesazhi im sot për të gjithë shqiptarët. Të kenë harmoni midis tyre, dialog dhe të bëjnë vetëm vepra të mira”, u shpreh Presidenti i Republikës, Bamir Topi.

“Qëndrimi për sakrificën i pranuar nga Zoti na bën që ta shohim me optimizëm të ardhmen dhe unë uroj që kjo ditë të jetë e gëzuar dhe Bajrami i ardhshëm të na gjejë edhe më mirë”, theksoi kryetarja e Kuvendit, Jozefina Topalli.

“Uroj që sakrifica e çdo shqiptari t’i bëhet dritë në rrugën e ndërtimit të të mirës, të paqes, të shpresës, të harmonisë dhe të ardhmes”, deklaroi kryeministri Sali Berisha.

Ndërsa kryetari i opozitës Edi Rama zgjodhi ta bëjë urimin e tij nga xhamia e Kavajës.

Për besimtarët myslimanë në ditën e festës, bashkë me urimin, ka ardhur edhe një lajm i mirë nga Bashkia e Tiranës.

“Dua të njoftoj se në mbledhjen e ardhshme të Këshillit Bashkiak do të miratojmë komisionin për xhaminë e Tiranës ku do të përfshijmë përfaqësues të Komunitetit Mysliman. Së bashku do të nisim punën për t’i dhënë myslimanëve xhaminë që i mungon prej kohësh”, tha kryetari i Bashkisë së Tiranës, Lulzim Basha.

Aleanca Kuqezi: Partitë të heqin dorë nga qokat

Aleanca Kuq e Zi, duke uruar mbarë besimtarët myslimanë  për festën e Kurban Bajramit, i bëri thirrje partive politike në vend që të heqin dorë nga kryerja e qokave sipërfaqësore politike në ditën e festave fetare.

“Aleanca Kuq e Zi kërkon me forcë që në ditët e festave kombëtare të ndalohen mesazhet politike të liderëve dhe organeve politike në vend”, thuhet në një deklaratë për shtyp.

Sipas Aleances Kuq e Zi, liderët i përdorin festat për mesazhe politike dhe se partitë kanë politizuar në maksimum shoqërinë shqiptare, kanë politizuar çdo festë kombëtare dhe fetare.
 

Top Channel