Nigeria njeh pavarësinë e Kosovës

12/09/2011 21:40

Zëvendëskryeministri i Kosovës, Behgjet Pacolli në kuadër të turneut të tij lobues në kontinentin e Afrikës ka arritur të sigurojë një tjetër njohje të pavarësisë së Kosovës.

Lajmin e bën të ditur agjencia e shtypit “INA”, e cila i referohet burimeve pranë zyrës së Pacollit.

Sipas numrit dy të qeverisë kosovare, Kosovën e ka njohur sot zyrtarisht Nigeria, ndërkohë që në ditët e ardhshme do të ketë njohje edhe nga Afrika e Jugut.

Gjatë turit të zotit Pacolli në Afrikë, Kosova është njohur nga Arika Qendrore, Guinea Konakri, Benini, Nigeri dhe Gaboni, ndërkohë që me Nigerinë shkon në 83 numri i njohjeve.

Egjipti do njohë së shpejti Kosovën

Ministri i Jashtëm kosovar, Enver Hoxhaj, i cili këto ditë po viziton Kajron, ka deklaruar se ka marrë premtim nga Egjipti se do të njohë së shpejti pavarësinë.

Gjithashtu, i cituar nga mediat kosovare, Hoxhaj ka bërë të ditur se ka marrë mbështetje nga përfaqësues të Organizatës së Ligës Arabe, nga 22 vende të të cilës, 10 kanë njohur sovranitetin e Kosovës.

Hoxhaj është takuar me sekretarin e përgjithshëm të organizatës, Nabil Al Arabi, i cili e ka garantuar se njohja nga 12 vendet anëtare do të vijë së shpejti.

Ndërsa në një takim të zhvilluar me kandidatin për president të Egjiptit, Amr Moussa, Hoxhaj ka marrë garanci për njohjen, menjëherë pas mbajtjes së zgjedhjeve demokratike në këtë vend.

Top Channel