Heronjtë që “përqeshin” vdekjen

Ndërsa jeta në Japoni i është rikthyer me aq sa mundet normalitetit, frika e rrezatimeve u rikthye sot, pasi nivele alarmante u regjistruan në perimetrin përreth Fukushimës.

”50 heronjtë e Fukushimës” vazhdojnë të luftojnë për të stabilizuar reaktorin, edhe pse për shumë prej tyre vdekja do të jetë e sigurt kur kriza të përfundojë. Ata po rikthejnë në mendje “likuidatorët” e Çernobilit, heronjtë që dhanë jetën e tyre për të kufizuar dëmet e incidentit famëkeq bërthamor të ndodhur në Bashkimin Sovjetik, në vitin 1986.

Atëherë, mbi 200 burra luftuan ndaj vdekjes së sigurt, përfshi një grup prej dhjetë personash, që u hodh pa veshje mbrojtëse në një pishinë me ujë radioaktiv, duke bërë të mundur që të mbyllej një valvul, e cila do të bënte që i gjithë uji të derdhej në një lum që përshkronte mes për mes Kievin dhe disa qytete të tjera të rëndësishme.

Të 10 “likuidatorët” e kësaj ngjarje pësuan një vdekje të tmerrshme, vetëm disa orë pasi i shpëtuan jetën me miliona personave.

Në Japoni, veçanërisht prekëse kanë qenë video dhe mesazhet që disa prej 50 burrave i kanë dërguar familjeve. Shumë prej tyre i kanë dërguar lamtumirën e fundit fëmijëve dhe grave, duke i kërkuar t’i kuptojnë se detyra i thërret në këto orë të vështirë.

Pavarësisht kthesës negative të ditës së sotme, është meritë e këtyre burrave që situata në reaktor duket se është stabilizuar, ndërsa të paktën më e keqja duket se është shmangur.

50 heronjtë e Fukushimës mund të mos jetojnë aq gjatë sa për të parë kombin të “lulëzojë nga rënojat e tij”, siç premtoi Kryeministri Kan, por ata do të jetojnë përgjithmonë në kujtesën e Japonisë dhe historisë botërore.  

Top Channel