PS: Meta, frikë nga zemërata e shqiptarëve

PS ka deklaruar se daljet e njëpasnjëshme publike të Metës tregojnë gjithnjë e më shumë përfshirjen e tij në afera korruptive.

“Sa më shpesh shfaqet në publik, aq më shumë i kujton Ilir Meta shqiptarëve pamjet e matrapazit me bllok në dorë. Sa më shumë del në televizor, aq më shumë arsye i jep Ilir Meta shqiptarëve për të protestuar në demonstratën e së premtes”, ka deklaruar zëdhënësja e PS, Megi Ajtyresa.

Duke hedhur poshtë akuzat, PS është shprehur se frika e kreut të LSI nga zemërimi i shqiptarëve për shkak të aferave të tij është mëse normale.

“Pas asaj shfaqjeje të turpshme që e panë dhe dëgjuan të gjithë shqiptarët, është e kuptueshme që Ilir Meta të ketë frikë nga zemërata e popullit dhe sigurisht të ketë edhe më shumë frikë nga ndëshkimi i sigurt që populli shqiptar do t’i japë, ndjesë pastë, Lëvizjes Socialiste për Integrim me votë”, ka pohuar Ajtyresa.

Ajo ka shtuar se protesta e 21 janarit është protesta e qytetarëve, të cilët sipas saj do t’i japin goditjen e merituar qeverisë së korrupsionit.

“Por sot, Ilir Meta dhe kryeministri i tij i lajthitur duhet ta kenë të qartë se demonstrata e 21 janarit nuk është përpjekja e PS për të fituar pushtet, por është e drejta e cdo qytetari për të protestuar dhe demonstruar kundër këtij pushteti kusarësh dhe matrapazësh”, ka shtuar Ajtyresa.

Top Channel