Përmbytjet në Shkodër nuk do të ishin të këtyre përmasave, nëse gjatë muajve të verës do të ishin kryer studime dhe investime.
Aktualisht në vend, raportohet për sasinë e prurjeve, por jo të reshjeve çka e bën të vështirë marrjen e masave paraprake nga specialistët për parandalimin e katastrofave të tilla.
Inxhinier dhe profesorë të njohur, theksojnë se në këto ditë të vështira për shumë qytetarë në Shkodër, por edhe në shumë zona të tjera të vendit, vëmendja e Shtabit të Emergjencave duhet të fokusohet në ruajtjen e nivelit të argjinaturave, në disiplinimin e prurjeve të lumenjve dhe të përrenjve malorë.
Profesor Përparim Hoxha tha se ruajtja e argjinaturës së Torovicës, është thelbësore pasi çarja e saj do të shkaktonte një tjetër katastrofë.
“Përmasat e do të ishin më të vogla nëse do të ishin marrë të gjitha ato masa, që të ruheshin sistemi i kanaleve të larta, të funksiononte sistemi i kanaleve kullues, sistemi i hidrovoreve dhe argjinaturat mos përmbyteshin. Nuk është zbatuar për mua një strategji e plotë që ta zgjidhi përfundimisht sistemin e ujitjes, kullimit e të ruajtjes së kësaj zone nga përmbytjet”, deklaron profesor Përparim Hoxha, dekan në Fakultetin Gjeologji-Minierë.
“Kapaciteti ujëheqës i Bunës në dalje të Baçallëkut është shumë i vogël, rreth 1 mijë 200 metra kub në sekondë dhe kur jane 1400 del në fushë në dy anët e lumit, në krahun e Obotit dhe të Dajçit. Problemi nis që tek fillimi i Bunës”, shprehet inxhinier Dhimitër Vogli.
Ata theksojnë se është domosdoshmëri ngritja e një grupi specialistësh që të identifikikojnë problemet në terren, të kryejnë studime e me pas të merren të gjitha masat e duhura finaciare për implementimin e tyre.
Top Channel
