Opozita akuzon qeverinë se po thith gjithë likuiditetin monetar nga tregu duke reduktuar kështu mundësite për kreditim dhe investime për biznesin privat. (UPDATE)
“Thatësira financiare detyron qeverinë të rrisë huamarrjen e brendshme në 860 % kjo vetëm për 4 muajt e parë të 2010. Huamarrja e brendshme është rritur 8 herë më shumë se parashikimet e Bodes e të qeverisë për huammarje nga shteti shteron fondet e bankave për kredi për biznesin. Huamarrja e brendshme si dhe shit-blerja e detyruar e Hotel Dajtit tregon dëshpërimin e Ministrisë së Financave për para si dhe implikimin e guvernatorit në skema financiare piramidale me kosto të lartë për parametrat makroekonomike të vendit”, tha deputeti i PS-së, Ervin Bushati.
Sipas Bushatit kjo rritje e huamarjes së brendshme të qeverisë është shenjë paniku që ka kapur financat e shtetit që po vuajnë mungesën e parave.
Por demokratët reaguan duke thënë se akuzat e opozitës se qeveria po bllokon ekonominë private në vend janë shpifjet e radhës pasi shifrat tregojnë të kundërtën.
“Këta shokë mjeranë nuk kuptojnë se në krizë të thellë dhe të pashpresë madje, janë ata dhe jo biznesi shqiptarë që në 4 muajt e parë të këtij viti regjistroi 7500 biznese të reja kundrejt 5300 që u regjistruan 4 muajt e parë të vitit 2009. Në krizë të rëndë psikike dhe morale jeni ju Edvin 2K dhe çeta juaj e bllokmenëve të rinj dhe jo bankat dhe krediti shqiptar që kanë një rritje prej 14 përqind të depozitave, që kanë rritur kredinë në këto muaj me 8 përqind dhe që janë më mirë se asnjëherë tjetër më parë. Financat e vendit më 1 korrik të këtij viti do të realizojnë rritjen më të madhe të rrogave dhe pensioneve në Shqipëri dhe në Europë”, replikoi në një konferencë për shtyp zëdhënësja e Partisë Demokratike, Erla Mëhilli.
Top Channel
