Rama në Top Story, Sokol Balla: U formalizua skenari i zgjedhjeve pa PD

Vetë Sokol Balla komentoi në edicionin qendror të lajmeve zhvillimet me të fundit dhe pritshmëritë nga intervista me Kryeministrin Rama në Top Story.

“Zhvillimet e sotme, në një plan më të gjerë, formalizojnë atë skenar që asnjëri nga ne nuk është optimist; skenari i zgjedhjeve në 18 qershor pa pjesëmarrjen e opozitës dhe nga ana tjetër, formalizimi i kandidaturës së Ilir Metës për President tregon kohezionin që vazhdon mes dy partive të majta dhe pjesëmarrjen e LSI në zgjedhjet e 18 qershorit”, thotë Balla.

“Ky është një moment kritik edhe i opozitës që duhet të bëjë një bilanc të aksionit të saj politik, që sot braktiset nga Ilir Meta dhe ky aksion me bojkotimin e zgjedhjeve po shkon drejt një rruge të panjohur”, vijoi ai.

Sokol Balla komentoi edhe deklaratën e ambasadorit Donald Lu, që tha se “zgjedhjet janë më të mira me pjesëmarrjen e të gjithëve, por zgjedhjet janë të ligjshme dhe legjitime edhe pa opozitën”.

Drejtori i informacionit në Top Channel tha se tani situata bëhet akoma më e komplikuar dhe me më shumë pikepyetje, që do të marrin përgjigjje nga Kryeministri Rama në Top Story në orën 21:00. Balla përmendi lëshimet e mazhorancës për opozitën.

“Përfshirë ministrinë e Brendshme, atë të Arsimit dhe ministritë që potancialisht kanë ndikim në zgjedhje, por nuk ofroi të vetmen kërkesë të opozitës; atë të qeveri teknike pa Edi Ramën. Për këtë do ta pyes Kryeministrin që  mos në fakt, kostoja e gjithçkaje do të ishte më e ulët nëse ai do të dorëzonte postin e Kryeministrit?”, u shpreh Balla.

Top Channel