Dhëndri i Trump në Irak, pritet nga gjenerali i lartë

Kushner, që është prej kohësh një këshilltar i afërt i Trump, është takuar me komandantin e trupave amerikane në Irak, Joseph Dunford.

Oficeri i lartë deklaroi se e kishte ftuar zotin Kushner për ta informuar në lidhje me situatën në terren në mënyrë të drejtpërdrejtë.

Ndërsa një zëdhënës i Kushner tha se, ai po udhëton edhe për llogari të presidentit, për t’i shprehur liderëve irakenë mbështetjen e qeverisë amerikane.

“Gjatë takimeve me zyrtarët irakenë, zoti Kushner do të riafirmojë angazhimin e Shteteve të Bashkuara në luftën kundër ISIS”, tha Greg Hicks.

Kushner, që është bashkëshorti i vajzës së Trump, Ivanka, refuzoi të fliste për mediat në avion, përpara se të mbërrinte në Irak.

Por analisti i BBC, Anthony Zurcher thotë se, në një kohë kur vetë Trump nuk ka qenë në Irak dhe po ashtu as sekretari i Shtetit Tillerson, Kushner është kthyer në “sytë dhe veshët” e presidentit në Uashington dhe në mbarë botën.

“Ai është një person me portofol të palimituar. Çështje delikate ndërkombëtare, reformat ekonomike me biznesin, përmirësimi i shërbimeve për veteranët, lufta kundër vartësisë nga droga dhe të tjera janë të gjitha në listën e detyrave të tij”, thotë Zurcher.

A është zoti Kushner në lartësinë e duhur për bisedime të tilla, kur eksperienca e tij në një funksion publik është tepër e vakët? – pyet analisti.

Presidenti Trump duket se është i këtij mendimi, gjë që ngre dyshime mbi filozofinë e qeverisjes së tij, shton Zurcher.

Top Channel