Dëbora bllokoi Rinasin. Policia: Udhëtarët nuk përdorin goma dimri

“Ka probleme duke filluar nga Qafë Kashari në drejtim të Rinasit dhe Urës së Gjoles. Ka prezencë të akullit në rrugë”, ka deklaruar Ervin Hasrama, shef i Qarkullimit të Tiranës.

Në ktë aks, por edhe rrugë të tjera, gjatë natës dhe orëve të para të mëngjesit u regjistruan më shumë se 25 aksidente.

“Nuk mund të themi aksidente, janë pëplasje me dëme materiale fare të vogla. Problem mbetet mosvendosja e gomave të stinës nga drejtuesit e mjeteve, gomave dimrore. Në disa akse duhet të përdoren edhe zinxhirë”, ka thënë Hasrama.

Ndërkohë, autostrada Tiranë-Durrës iu rikthyre normalitetit, por policia bën apel që të tregohet kujdes në rrugët dytësore. Me zinxhirë është i detyrueshëm edhe kalimi në aksin Tiranë-Dajt.

Zhbllokohet aeroporti, vonesa për shkak të dëborës

13 orë punë dhe mbi 5 tonë kripë janë dashur për të rikthyer në gjendje operimi pistën e aeroportit “Nënë Tereza”, të ngrirë si pasojë e borës. Disa borëpatruese dhe zjarrfikëse u panë në pistën e aeroprtit.

Moti i keq ka anuluar 4 fluturime në nisje dhe 2 në mbërritje. Udhëtarët nuk kanë mundur të fluturojnë nga Tirana drejt Beogradit, Bolonjës, Milanos dhe Venecias.

Ndërkohë, në mbërritje janë anuluar fluturimi i mbrëmjes së të mërkurës nga Stambolli drejt Tiranës dhe ai i Romës. Pas orës 11:30 operimet në aeroport rifilluan, ndonëse në disa raste pati vonesa.

Top Channel