Zihet me Southgate, Rooney rrezikon kombëtaren

18/11/2016 00:00

Wayne Rooney nuk gjen paqe. Pas fotove të publikuara nga “The Sun”, ku ai shfaqej në gjendje të dehur gjatë një ceremonie martese, sulmuesi është përfshirë në një zënkë me trajnerin e përfaqësueses angleze, Gareth Southgate.

Sipas burimeve të brendshme të Federatës Angleze të Futbollit (FA), shkaku i debatit mes trajnerit dhe futbollistit ishte pikërisht gjendja e këtij të fundit. Madje, është arritur deri aty sa Southgate po mendon t’i heqë Rooney-t shiritin e kapitenit.

Ndërkaq, FA-ja bëri të ditur hapjen e hetimeve për të kuptuar se çfarë ndodhi me saktësi në atë ceremoni martese dhe kush ishte i pranishëm në Grove Hotel, por tabloidët britanikë u treguan të shpejtë dhe publikuan disa prej detajeve.

Sipas “The Sun”, Southgate i kërkoi Rooney-t që t’u jepte fund festimeve dhe të shkonte të flinte, por sulmuesi i Manchester United e injoroi këtë kërkesë të trajnerit të tij dhe vijoi me konsumin e alkoolit dhe argëtimin deri në orët e para të mëngjesit.

Tani, e ardhmja e 30-vjeçarit në kombëtaren angleze është me të vërtetë në dyshim. Media thekson se heqja e shiritit të kapitenit është dënimi minimal për Wayne Rooney dhe se gjithçka varet nga pozita e Southgate. Nëse ky i fundit do të konfirmohet në pankinë, diçka që ka shumë gjasa të ndodhë, atëherë karriera e Rooney me “Tre Luanët” mund të shkojë drejt fundit.

Top Channel