SHBA, dita e tretë e Konventës demokrate. Obama, Biden dhe…Kaine

Për Obamën mund të mos ketë rast tjetër kaq të rëndësishëm sa ky, për t’i kërkuar koalicionit të tij elektoral mbështetjen e gruas që mposhti dikur. Në njëfarë mënyre, ngjitja në podiumin e Konventës do të jetë mundësi e mirë edhe për t’i bërë një mbrojtje të fuqishme trashëgimisë së vet tetëvjeçare në Shtëpinë e Bardhë.

Presidenti do t’ua bëjë të qartë miliona shikuesve se Hillary Clinton është shpresa për vazhdimësinë e politikave të tij. Në politikë pak gjëra janë të sigurta, por ajo çfarë dinë një pjesë e amerikanëve është se Joe Biden ndien ende keqardhje për faktin që nuk e bëri përpjekjen finale të marrjes së postit që ka aspiruar gjithë jetën.

Një keqardhje, të cilën me shumë gjasë nuk do ta shprehë kurrë publikisht, e sidomos jo gjatë fjalimit në Konventë, ku do të përcjellë mbështetjen e plotë për ish-Sekretaren e Shtetit.

Pritshmëritë janë të larta ndërkohë për Kaine, të lavdëruar shumë deri edhe nga disa republikanë. Clinton hyri në histori si e para grua që zgjidhet zyrtarisht kandidate për presidente e njërës prej partive kryesore në Shtetet e Bashkuara.

Në fjalimin e mbajtur në Filadelfia, bashkëshorti i saj, ish-presidenti demokrat Bill Clinton u përpoq t’u tregonte amerikanëve përse e shoqja, e njëkohësisht “mikja e tij” më e mirë, siç e përshkroi edhe vet, duhet t’i udhëheqë Shtetet e Bashkuara.

Top Channel