Serbia miraton rezolutën për Kosovën

13/01/2013 12:20

Kuvendi serb ka miratuar rezolutën për Kosovën, me të cilën Serbia kërkon autonomi për serbët e Kosovës, por refuzon njohjen e saj.

Polemika të ashpra kanë ndjekur përpjekjet e Kuvendit të Serbisë për të dalë me një qëndrim unik dhe pas 14 orësh debat, 175 deputetë nga 250 kanë votuar për rezolutën, 19 kanë qenë kundër, kurse deputetët tjerë nuk votuan.

Janë propozuar 15 amendamente, prej të cilave 14 janë refuzuar nga Këshilli për Kosovën i Kuvendit, ndërsa demokratët tërhoqën amendamentin e tyre për mundësi të ndërprerjes së bisedimeve.

Ata shprehën dyshimet se një platformë e tillë mund të ekzistojë dhe qeveria vendosi heqjen e sekretit shtetëror për platformën.

Fillimisht, deputetëve u është drejtuar kryeministri, Ivica Dacic, i cili tha se Serbia në Kosovë pothuajse nuk ka fare sovranitet. “Në Kosovë situata është e vështirë. sovraniteti i Serbisë nuk ekziston pothuajse fare në Kosovë, institucionet serbe janë duke u dëbuar nga Kosova, e serbët nuk kanë ndërtuar institucionet e tyre autonome”, theksoi ai, duke sqaruar situatën në Kosovë.

Ndërsa në mbrëmje, pas një dite maratonike, deputeteve u është drejtuar edhe presidenti, Tomisllav Nikoliç, i cili tha se ka humbur shumë beteja, por Kosovën nuk mund ta humbë.

“A jam i lumtur që do ta miratoni një rezolutë të tillë. Nuk jam. Në jetë kam humbur shumë, por Kosovën nuk mund ta humb pasi nuk është e imja. Unë po mbaj mbi vete një kryq, ju lutem mbajeni dhe ju nga një kryq të vogël dhe nëse kjo është e rënd për ju atëherë votoni kundër”, ka thënë Nikoliç.

Rezolutën nuk e kanë mbështetur as ultranacionalistët dhe liberalët, ndërsa gjatë ditës radikalët kanë protestuar para Kuvendit duke kërkuar ndërprerjen e bisedimeve.

Rezoluta, ushtri serbe dhe shqiptare në Kosovë?

Rezoluta e Serbisë për Kosovën i jep fuqi kryeministrit serb dhe grupit të bisedimeve për të shkuar në negociata me Kosovën, duke vepruar në bazë të platformës politike të Serbisë të cilën edhe e mbështet rezoluta.

Qeveria serbe dhe presidenca hartuan në konsultim edhe me serbët e Kosovës një dokument, i cili sipas detajeve të bëra publike, parasheh një autonomi për serbët e Kosovës dhe komunat serbe në veri.

Me këtë ide, serbët do të kishin një parlament të tyre, një polici dhe një nivel autonom të drejtësisë, ndërsa do të kishin edhe kompetenca në energjetikë dhe nivele të tjera.

Ideja e platformës të cilën e mbështetë rezoluta për bisedimet me Kosovën, thotë se serbët, përkatësisht edhe kishat ortodokse, do t’i ruante Ushtria e Serbisë, Ushtria e Shqipërisë dhe bashkësia ndërkombëtare.

Në dokument saktësohet se Serbia nuk do ta pranojë kurrë pavarësinë e Kosovës, por në këtë mënyrë institucionet serbe në Kosovë do të ishin të pranueshme edhe për Prishtinën dhe për bashkësinë ndërkombëtare.

Qeveria pritet ta publikojë dokumentin në tërësi, kurse ky është dokumenti apo rezoluta e 11 me radhë për Kosovën e miratuar në Kuvend.

Top Channel