Shpërthimi në Mjekës, “sherr” mes vendorëve dhe ushtrisë

Sipas gazetës “Shqip”, ata janë ankuar për shpërthimin e fuqishëm që dyshohet të ketë ndodhur mbrëmjen e së mërkurës, duke kërkuar marrjen e masave të menjëhershme. Ndërkohë që drejtuesi i Uzinës së Lëndëve Plasëse në Mjekës, Daniel Karanxha, nuk ka treguar frymë bashkëpunimi me komunitetin dhe komunën.

Kërkesa

Të enjten këshilltarët kanë lexuar një kërkesë që Karanxha ia ka drejtuar komunës. Ai kërkon që të ndalen ndërtimet pa leje pranë uzinës së Mjekësit dhe të shemben ato që aktualisht janë informale. Komuniteti ankohet se kreu i ULP-së nuk ka bashkëpunuar asnjëherë me komunën dhe se aktiviteti që zhvillohet në uzinë nuk është i pajisur me leje mjedisore. Kjo e fundit nuk është miratuar nga anëtarët e Këshillit të Komunës.

Në një zë ata shprehen se tre fshatrat që ndodhet në kufi me Mjekësin,janë mjaft të prekur nga ndotja akustike. Kreu i Komunës së Shirgjanit, Mustafa Shehu, ka kërkuar vazhdimisht një takim me Karanxhën për të diskutuar rreth problemeve të hasura dhe ky i fundit nuk i është përgjigjur kërkesës së tij.

Shpërthimi

Drejtori i Uzinës së Lëndëve Plasëse në Mjekës, Daniel Karanxha, e ka mohuar faktin e shpërthimit të furrës së asgjësimit të municioneve luftarake. Ai ka sqaruar se gjatë procesit të demontimit në një prej furrave ka pasur një avari tek filtrat. Sipas tij, si për shkak të një defekti të ventilatorëve të sistemit të ftohjes së gazrave janë djegur filtrat e pastrimit. Por sipas tij, puna në uzinë vijon normalisht. Megjithatë mediat nuk janë lejuar që të futen në ambientet e uzinës, për të parë nga afër se çfarë ka ngjarë në të vërtetë në Uzinë.

Gazeta Shqip

Top Channel