Ruben Amorim nuk e fsheh zemërimin e tij për humbjen e pësuar nga Ferencvaros në San Siro në ndeshjen e raundit të katërt të Europa League.
Kuqezinjtë pësuan disfatën e 3 në 4 sfida të luajtura gjë që ia komplikon jo pak gjërat dhe trajneri nuk i kurseu kritikat e ashpra ndaj skuadrës së tij.
‘Nuk ka asnjë shpjegim, nuk ka asgjë që mund të them sidomos për pjesën e parë-tha Amorim-nuk kujtoj të kemi bërë ndonjëherë një pjesë të parë kështu. Bëhet fjalë për ambicie, përqendrim. Dhuruam raste, bëmë dhurata idiote. Nuk ishim të përgatitur për të luajtur futboll sonte. Nuk ishim gati të kalonim nga derbi te një kompeticion tjetër. Kur luan me fanellën e Milanit ke një përgjegjësi dhe nuk mund të paraqitesh në të njëjtën mënyrë. Ndoshta edhe unë nuk ia dola që të bëja që skuadra të ishte gati në fushën e lojës’.
Amorim shtoi se Milani nuk është ende gati për të konkurruar në 2 fronte, por që gjithsesi nuk ka justifikime për këtë humbje.
‘Nuk jemi gati për të qenë kompetitivë në dy fronte. Duhet të punojmë me mënyrën tonë sesi e shohim futbollin dhe qasjen tonë në ndeshje-vijoi Amorim-për sonte nuk ka justifikime, nuk ka asgjë që unë të mund të them. Zakonisht kam shumë për të thënë për të mbrojtur skuadrën tonë, por sonte jo. Duhet të jemi më të përulur dhe të kuptojmë çfarë ndodhi’
Megjithatë Amorim, pavarësisht kësaj humbjeje tha se nuk ka ndërmend të heqë dorë nga Europa League.
‘Sigurisht që duhet të mendojmë për kampionatin, por duhet të bëjmë mirë edhe në Europa League-shtoi Amorim-duhet dhe mund të fitojmë ndeshjet tona pavarësisht rotacioneve. Duhet të jemi gati, tani nuk jemi, për të luajtur e fituar çdo 3 ditë. Por nuk do të heq dorë nga ky kompeticion. Por përsa kohë matematika nuk na ka dënuar ende, në këtë kompeticion do të luftojmë si te të tjerat’.
Top Channel
