Për të riun Lorenzo Torriani erdhi më në fund momenti për të përjetuar një mbrëmje evropiane. Të enjten e 5 nëntorit, në ndeshjen ndaj Ferencvaros e vlefshme për raundin e katërt të Europa League, do të jetë 21 vjeçari ai që do të ketë detyrën të mbrojë portën e Milanit në vend të Maignan.
Kapiteni i kuqezinjve nuk do të jetë në këtë përballje me hungarezët për shkak të kartonit të kuq të marrë në ndeshjen me Bournemouth dhe kështu Ruben Amorim është gati t’i besojë portierit të ri, produkt i akademisë së Milanit. Për Torrianit, ndeshja e së enjtes do të përbëjë debutimin absolut si titullar me fanellën e klubit milanez
Lorenzo Torriani ka luajtur më parë me skuadrën e parë të Milanit, por është aktivizuar si zëvendësues dhe për fatin e tij të keq gjërat nuk shkuan siç shpresonte me kuqezinjtë që dolën të humbur si në debutimin shokues ndaj Liverpool ashtu edhe në sfidën më të fundit, atë me Bournemouth përpara dy javësh.
Por tani për 21 vjeçarin ka ardhur momenti të kthejë faqe dhe të mos e shohë fushën nga pankina. Europa League i ofron shansin e artë për të treguar të gjitha vlerat e tij pikërisht në këtë përballje me Ferencvaros. Për më tepër, kjo ndeshje do të jetë për Torrianin edhe mundësia për të përmbysur fatin e keq të së kaluarës dhe për të blinduar portën e Milanit në mënyrë që klubi kuqezi të rindezë ambiciet evropiane të tij pas një fillimi të komplikuar.
Aktualisht Milani është në vendin e 24 në Fazën e Ligës në Europa League me vetëm 3 pikë dhe këtë të enjte klubi kuqezi shpreson që të ndryshojë marsh dhe mbase të sigurojë edhe të ardhmen përsa i përket portës.
Top Channel
