“Kemi nevojë për kohë që skuadra të rritet dhe të përmirësohet”/ Amorim para derbit me Interin: Nuk kam zili për Chivun, jam në vendin e duhur

Tekniku portugez foli për situatën e skuadrës, dëmtimet e shumta, objektivin për titullin kampion dhe rivalitetin me zikaltërit.

Amorim u shpreh se e vlerëson mbështetjen e pronarit të klubit, Gerry Cardinale, por pranoi se Milani ka nevojë për kohë për të ndërtuar një skuadër konkurruese dhe për të krijuar themele të qëndrueshme.

“E vlerësoj shumë mbështetjen e Cardinale. E dinim se nuk mund të ndërtojmë themele të forta nëse duhet të përballemi me këto probleme në mes të sezonit. Do të duhet kohë, kjo është e pashmangshme, por njëkohësisht duam të fitojmë çdo ndeshje. Kur nuk ia dalim, e përjetojmë me shumë dhimbje. Kemi nevojë për kohë që skuadra të rritet dhe të përmirësohet”, deklaroi trajneri.

I pyetur për rëndësinë e derbit të Milanos dhe dallimet me sfidat e ngjashme që ka përjetuar në Manchester dhe Lisbonë, Amorim tha se rivaliteti mes dy klubeve ka një karakter të veçantë, për shkak se ndajnë të njëjtin qytet dhe stadium.

“Është një ndeshje speciale. Është një rivalitet unik, dy skuadra të mëdha në të njëjtin qytet. Mendoj se kultura e futbollit këtu është më afër asaj portugeze. Në Angli është pak më ndryshe, ndërsa këtu ndihet ajo përbërësja latine që e njohim edhe në Portugali”, u shpreh ai.

Sa i përket gjendjes së lojtarëve, trajneri konfirmoi se Gila, Rabiot dhe Moreira janë gati t’i bashkohen skuadrës, ndërsa vendimi nëse do të jenë titullarë do të merret pas vlerësimit të fundit para ndeshjes.

Amorim foli edhe për humbjen ndaj Bolognës, duke pranuar se skuadra nuk mund të pësojë dy gola brenda dy minutash dhe se duhet të përmirësojë disa aspekte të lojës.

“Nuk mund të humbasim në atë mënyrë. Nuk mund të pësojmë dy gola në dy minuta. Mund të bëjmë shumë më mirë dhe ka disa detaje për të cilat kam diskutuar me lojtarët. Që nga kthimi i futbollistëve nga kombëtaret nuk kemi pasur kohë të mjaftueshme për t’u stërvitur. Ka shumë gjëra të vogla që po na shpëtojnë pikërisht sepse nuk kemi mundësi t’i trajtojmë në stërvitje”, tha portugezi.

Për objektivin e fitimit të titullit kampion, Amorim theksoi se ai mbetet synimi i Milanit, por pranoi se aktualisht ekziston një diferencë mes kuqezinjve dhe skuadrave që kryesojnë renditjen.

“Kur je Milani, objektivi është titulli kampion. Por sot duhet të kuptojmë se ka një diferencë me skuadrat në krye. Duam të fitojmë, por nuk duam të shpallemi kampionë një vit dhe sezonin tjetër të gjendemi përsëri në të njëjtën situatë. Nuk e di sa kohë do të na duhet, por synimi mbetet titulli”, u shpreh ai.

Një nga momentet më të spikatura të konferencës ishte përgjigjja për trajnerin e Interit, Cristian Chivu. Amorim u shpreh se nuk ka asnjë arsye për ta pasur zili kolegun e tij.

“Nuk kam aspak zili për Chivun, sepse jam në vendin e duhur, te Milani dhe jo te Interi. E zgjodha këtë projekt sepse më pëlqen sfida për të ndërtuar diçka nga e para, për të zhvilluar lojtarë të rinj dhe për të krijuar një skuadër. Jam i lumtur me zgjedhjen time. E di se duhet të fitojmë ndeshje për të fituar kohën e nevojshme për të ndërtuar diçka të qëndrueshme”, deklaroi trajneri.

Ai vlerësoi gjithashtu mënyrën se si luan Interi, duke theksuar se skuadra zikaltër ka fituar automatizma dhe pjekuri, çka i lejon të ruajë mënyrën e lojës edhe kur ndryshon formacionin.

“Interi mund të luajë edhe me sy mbyllur. Bën rotacione, por vazhdon të luajë në të njëjtën mënyrë. Ka një aftësi të jashtëzakonshme për të lexuar momentet e ndeshjes. Kjo është një siguri që fitohet kur fiton shumë ndeshje dhe trofe. Ata kanë shumë talent, por ne do të jemi aty për të luftuar”, tha Amorim.

Trajneri foli edhe për Gonçalo Ramos, duke e cilësuar si një lojtar që mund të bëjë diferencën në derbi. Sipas tij, sulmuesi po luan shumë larg portës kundërshtare për shkak të vështirësive të skuadrës për të shtyrë lojën drejt zonës kundërshtare.

“Ne e kontrollojmë mirë lojën, por luajmë shumë larg portës kundërshtare. Duhet të avancojmë më shumë si skuadër dhe të kalojmë më shumë kohë në atë zonë, në mënyrë që Ramos të bëjë lojën e tij. Ai ka treguar se mund të vendosë fatin e një ndeshjeje dhe mund të shënojë në çdo situatë”, u shpreh trajneri.

Një pjesë të rëndësishme të konferencës Amorim ia kushtoi edhe dëmtimeve të shumta. Ai mori përgjegjësinë për menaxhimin e ngarkesës fizike të lojtarëve, duke përjashtuar fajësimin e stafit mjekësor dhe të Milan Lab.

“Dëmtimet dhe problemet muskulore nuk kanë lidhje me stafin mjekësor apo me Milan Lab. Përgjegjësia është e imja, e trajnerit dhe e mënyrës se si e stërvit skuadrën. Stafi mjekësor po bën një punë të jashtëzakonshme. Ka faktorë që nuk mund t’i kontrollosh, por menaxhimi i ngarkesës është përgjegjësia ime”, theksoi Amorim.

Ai pranoi se, duke parë situatën aktuale, ndoshta do të kishte dashur të kishte më shumë lojtarë në dispozicion, por shpjegoi se në fillim të sezonit llogaritjet për rotacionet dukeshin të mjaftueshme.

Në fund, Amorim u shpreh optimist për të ardhmen e skuadrës, pavarësisht luhatjeve në rezultate dhe mungesës së kohës për stërvitje. “Duhet të zhvillojmë pjekurinë për të kontrolluar ndeshjet dhe për të menaxhuar momentet e ndryshme. Kemi nevojë të stërvitemi më shumë dhe të punojmë mbi detajet. Pavarësisht gjithçkaje, ju garantoj se do të bëhemi një skuadër shumë e madhe”, përfundoi trajneri i Milanit.

Top Channel