Festa e shegës në Lezhë, fruti i njohur për vlerat ushqyese përdoret në receta të veçanta kulinarie

Shefat e kuzhinës lezhjane kanë sjellë kreativitetin e tyre, duke e shndërruar këtë produkt në receta të veçanta, nga pastat dhe rizotot, te ëmbëlsirat dhe lëngu i shegës.

Një panair që mblodhi qytetarë të shumtë, duke dëshmuar se shega mund të jetë shumë më tepër sesa një frut, duke u kthyer në një përbërës të veçantë të gastronomisë.

Shefat e kuzhinës lezhjane tregojnë eksperiencën e tyre, duke zbuluar mënyrat e ndryshme se si shega mund të kombinohet në receta tradicionale dhe moderne.

Nga ana tjetër, sheshi u mbush me qytetarë të Lezhës, por edhe vizitorë nga zona të tjera, të cilët patën mundësinë të shijonin një shumëllojshmëri gatimesh me bazë shegën.

Festa e Shegës po kthehet tashmë në një traditë për Lezhën, duke bashkuar shefat e kuzhinës, qytetarët dhe vizitorët përmes shijeve dhe kreativitetit.

Një aktivitet që promovon produktet vendase, traditën gastronomike dhe potencialin e tyre, duke e kthyer shegën në simbol të kësaj feste dhe duke i dhënë një dimension të ri kulinarisë lezhjane.

Top Channel