Derbi i kryeqytetit mes Tiranës dhe Dinamo City ka mbyllur llogaritë në barazimin 1-1, në një sfidë ku episodi më ironik mbetet vetë zhvillimi i këtij takimi madhor në stadiumin “Niko Dovana” të Durrësit.
Pjesa e parë e ndeshjes u karakterizua nga një luftë e fortë taktike dhe episode të nxehta. Momenti më i bujshëm i fraksionit të parë u regjistrua në minutën e 26-të, kur Dinamo u shtang nga ndëshkimi i Rifa-s me karton të kuq nga kryesori Jorgji. Ky vendim solli menjëherë protesta të forta në kampin dinamovit, ku pretendonin se lojtari nuk e kishte prekur Alvarezin. Megjithatë, pavarësisht se bardheblutë përfituan nga avantazhi numerik dhe u shfaqën shpesh rrezikshëm duke fituar terren, pjesa e parë nuk prodhoi gola. Për t’u përmendur ishte edhe një aksion i rrezikshëm i Dinamos në minutën e 21-të, si dhe kartoni i verdhë i marrë nga trajneri Ilir Daja në minutën e 33-të.
Gjithçka u zhbllokua në pjesën e dytë, konkretisht në minutën e 64-t, kur sulmuesi Redon Xhixha gjeti rrugën e rrjetës, duke kaluar Tiranën në avantazh dhe duke ndezur festën e tifozëve bardheblu. Megjithatë, përgjigjja e Dinamo City nuk vonoi. Pavarësisht se luanin me një lojtar më pak, dinamovitët u hodhën në sulm për të kërkuar barazimin dhe e arritën objektivin në minutën e 78-të, me anë të Erion Hoxhallarit, i cili riktheu ekuilibrin në shifra (1-1).
Në minutat e mbetura të dyja skuadrat provuan të menaxhojnë lojën dhe të gjejnë golin e fitores, por rezultati mbeti i pandryshuar, duke bërë që sfida e luajtur në “Niko Dovana” të mbyllet me një ndarje paqësore dhe të drejtë të pikëve për të dyja rivalet e kryeqytetit.
Top Channel
