“Shpëtojeni Gonçalo Ramosin”/ Sulmuesi shkëlqen me Portugalinë, por vuan te Milani. Ja ku qëndron problemi

Sipas një analize të publikuar në mediat italiane, problemi nuk qëndron vetëm te sulmuesi, por edhe te mënyra se si skuadra kuqezi e mbështet në fazën sulmuese.

“Shpëtojeni Gonçalo Ramosin. Ai nuk është dhe nuk mund të jetë lojtari që shihni te Milani”, është mesazhi i fortë i analizës, e cila vë në dukje kontrastin mes paraqitjeve të sulmuesit për Portugalinë dhe atyre me klubin italian.

Me fanellën e kombëtares, Ramos ka regjistruar tre gola dhe një asist në katër ndeshje, shifra që tregojnë potencialin e tij si një qendërsulmues me aftësi për të bërë diferencën. Ndërkohë, te Milani, sipas analizës, ai ka shënuar vetëm një gol ndaj Venezias, duke humbur edhe disa raste të tjera për shënim.

Sipas analizës, një nga arsyet kryesore të këtij ndryshimi është mënyra se si ndërtohet loja rreth sulmuesit.

Me Portugalinë, Ramos ka më shumë mbështetje nga lojtarët ofensivë dhe merr më shumë topa në pozicione të favorshme. Në ndeshjen ndaj Norvegjisë, të fituar 2-1, ai gjeti mbështetje nga João Félix, Francisco Conceição dhe Bruno Fernandes, ndërsa Vitinha ndihmonte në organizimin e lojës më pranë zonës kundërshtare.

Ky konfigurim i jep sulmuesit më shumë mundësi të përqendrohet te detyra e tij kryesore: të krijojë rrezik dhe të shënojë gola.

Në të kundërt, te Milani, Ramos shpesh detyrohet të kontribuojë më shumë në punën pa top dhe në detyrat që lidhen me organizimin e lojës, duke u larguar nga zona ku mund të jetë më i rrezikshëm.

Analiza vë në dukje se Milani ka pasur vështirësi në vendosjen e lojtarëve pranë Ramosit. Ndryshimet e shpeshta në pozicionet e futbollistëve ofensivë dhe detyrat mbrojtëse të anësorëve kanë ndikuar në mënyrën se si skuadra arrin të krijojë raste.

Edhe Christian Pulisic, kur është aktivizuar në rolin e mesfushorit sulmues, është orientuar më shumë drejt ndërtimit të aksioneve sesa përfundimit të tyre, sipas vlerësimit të publikuar.

Për pasojë, Ramos rrezikon të mbetet i izoluar në majën e sulmit, pa furnizimin e nevojshëm me topa dhe pa mbështetjen e vazhdueshme të shokëve të skuadrës.

Në këtë situatë, analiza sugjeron se Milani ka nevojë për një tjetër sulmues që mund të ndajë përgjegjësitë me Ramosin dhe të shtojë praninë e skuadrës në zonën kundërshtare.

Në këtë kontekst përmendet edhe emri i brazilianit Endrick, i cili shihet si një alternativë që mund të luajë si sulmues i dytë, por edhe në majën e sulmit.

Aftësia e tij për të depërtuar në zonë dhe për të shfrytëzuar hapësirat mund t’i japë Milanit më shumë alternativa në fazën sulmuese. Sipas analizës, një lojtar me karakteristikat e Endrick mund të krijojë më shumë hapësira dhe mundësi edhe për Ramosin.

Top Channel