Sulmi në aeroportin e Riadit shkakton tragjedi, 12 të vrarë dhe mbi 300 të plagosur

Lajmi është konfirmuar nga autoritetet lokale, ndërsa operacionet në aeroportin ndërkombëtar King Khalid janë pezulluar. Sipas autoriteteve saudite të aviacionit civil, mes viktimave janë katër shtetas sauditë, dy nga Bangladeshi dhe nga një shtetas i Shteteve të Bashkuara, Jordanisë, Palestinës, Sirisë, Sudanit dhe Egjiptit. Disa prej të plagosurve ndodhen në gjendje kritike.

Dëmet në aeroport janë ende duke u vlerësuar, ndërsa dëshmitarët raportojnë skena paniku. Një person që ndodhej në terminalin e fluturimeve të brendshme tha se pa portën 401 të goditej dhe njerëz të plagosur para syve të tij.

“Të gjithë po vraponin”, tha dëshmitari, duke përshkruar momentet e sulmit. Sipas agjencisë “Reuters”, më shumë se një duzinë ambulancash u panë duke mbërritur me shpejtësi në aeroport.

Zëdhënësi i koalicionit ushtarak të udhëhequr nga Arabia Saudite, gjeneralmajor Turki al-Maliki, deklaroi se sulmi ndaj një prej terminaleve të pasagjerëve shkaktoi viktima dhe të plagosur mes udhëtarëve dhe punonjësve të aeroportit. Ai e cilësoi ngjarjen si një “krim të mirëfilltë lufte”.

Koalicioni fajësoi për sulmin rebelët Huthi të Jemenit, të cilët mbështeten nga Irani. Deri tani, ata nuk kanë komentuar drejtpërdrejt sulmin e së shtunës, por kanë marrë përgjegjësinë për sulme të tjera ndaj të njëjtit aeroport, të kryera të enjten, ku mbetën të vrarë tre persona dhe u dëmtua një avion.

Tre persona të tjerë u vranë në sulme të veçanta të Huthëve ndaj dy aeroporteve saudite më 6 dhe 7 tetor. Sulmi i fundit konsiderohet më vdekjeprurësi në Arabinë Saudite që nga maji i vitit 2015.

Sekretari amerikan i Shtetit, Marco Rubio, dënoi ashpër sulmet e fundit ndaj Arabisë Saudite dhe konfirmoi se mes viktimave ishte edhe një shtetas amerikan.

I pyetur nëse Shtetet e Bashkuara mund t’i bashkohen Arabisë Saudite në sulme ushtarake kundër Huthëve, presidenti Donald Trump deklaroi se administrata e tij po e shqyrton këtë mundësi.

“Mund ta bëjmë. Do ta shqyrtojmë. Sapo mësuam për sulmin e fundit, ndaj do të marrim një vendim. Ne veprojmë shumë shpejt”, u shpreh Trump para gazetarëve.

Ndërkohë, sekretari i përgjithshëm i Kombeve të Bashkuara, António Guterres, tha se ishte “thellësisht i tronditur” nga sulmet, të cilat i cilësoi si shkelje të së drejtës ndërkombëtare.

Ai kërkoi që sulmet të ndalen menjëherë. Ngjarja u dënua gjithashtu nga Egjipti, Palestina dhe Katari.

Ambasadat perëndimore në Arabinë Saudite u kanë bërë thirrje shtetasve të tyre të qëndrojnë larg aeroportit të Riadit. Ministria e Jashtme britanike këshilloi qytetarët britanikë të shmangin zonën derisa aeroporti të konsiderohet i sigurt.

Disa kompani ajrore të Gjirit kanë anuluar fluturimet drejt dhe nga Riadi, ndërsa të tjera kanë pezulluar shërbimet për shkak të situatës së sigurisë. Sipas platformës së gjurmimit të fluturimeve Flightradar, fluturimet drejt kryeqytetit saudit janë anuluar ose devijuar.

Sulmi ndodh në një periudhë të përshkallëzimit të luftimeve mes forcave qeveritare të Jemenit, të mbështetura nga Arabia Saudite, dhe rebelëve Huthi, të cilët kontrollojnë pjesën më të madhe të vendit dhe mbështeten nga Irani.

Huthët pretendojnë se sulmet ndaj Arabisë Saudite janë kundërpërgjigje ndaj mbështetjes saudite për qeverinë jemenase dhe ndaj asaj që e cilësojnë si bllokadë shumëvjeçare.

Përshkallëzimi i fundit lidhet edhe me zhvillimet përgjatë bregdetit të Detit të Kuq, ku Huthët kanë marrë nën kontroll zona me rëndësi strategjike, përfshirë portin e Mokhës pranë ngushticës Bab el-Mandeb, një pikë kyçe për transportin detar ndërkombëtar.

Koalicioni i udhëhequr nga Arabia Saudite u krijua në vitin 2015, me synimin për të penguar marrjen e pushtetit në Jemen nga Huthët dhe për të mbështetur qeverinë e njohur ndërkombëtarisht.

Në vitin 2022, palët arritën një armëpushim të përkohshëm pas vitesh bombardimesh dhe luftimesh tokësore, të cilat shkaktuan qindra mijëra viktima dhe kontribuuan në një nga krizat më të rënda humanitare në botë.

Megjithatë, armëpushimi joformal nisi të dobësohej në korrik. Huthët shpallën një “bllokadë detare” ndaj Arabisë Saudite dhe intensifikuan sulmet me raketa dhe dronë ndaj aeroporteve, objekteve të naftës dhe anijeve-cisternë në Detin e Kuq.

Situata mbetet e tensionuar, ndërsa nuk dihet ende nëse sulmi ndaj aeroportit të Riadit do të pasohet nga një kundërpërgjigje e drejtpërdrejtë ushtarake e SHBA-së dhe Arabisë Saudite.

Top Channel