Bizneset kërkojnë lehtësi/ Paketa fiskale 2027, propozohen ulje të TVSH-së dhe grante për teknologjinë

Buxheti i 2027-ës që pritet të kalojë 10 miliardë euro dhe paketa fiskale pritet të marrin formë gjatë javëve të ardhshme ndërkohë që bizneset kanë nisur ti paraqesin qeverisë kërkesat për lehtësira fiskale me synim uljen e kostove dhe nxitjen e investimeve.

Dhoma e Tregtisë dhe Industrisë Tiranë i ka depozituar pranë Ministrisë së Financave propozimet për paketën fiskale të vitit të ardhshëm duke kërkuar rishikimin e barrës tatimore për sektorët prodhues dhe përpunues.

Ndër kërkesat kryesore është ulja e TVSH për agropërpunimin në 5 deri në 7%, zero TVSH për fertilizantët si dhe përjashtimin nga TVSH në import për makineritë e përdorura në industrinë prodhuese dhe sektorin e energjisë. Dhoma kërkon gjithashtu lehtësim të tarifave doganore për lëndët e para, rimbursim të akcizës për gazin dhe lëndët djegëse si dhe rritjen nga 20 në 40% të normës së amortizimit fiskal për makineritë dhe pajisjet.

Në të njëjtën linjë janë edhe kërkesat e Shoqatës ‘Manifaktura Shqiptare’ e cila propozon harmonizimin e pragut të patatueshëm të pagave me pagën minimale, uljen e kostove të sigurimeve shoqërore për punëdhënësit dhe përjashtimin nga tatim-fitimi të fitimeve të riinvestuara në aktivitetin prodhues.

Shoqata kërkon gjithashtu një skemë të posaçme grantesh për teknologjinë, automatizimin dhe modernizimin industrial. Kërkesat vijnë në një moment të vështirë për manifakturën, ku eksportet në shtatë muajt e parë të vitit sipas të dhënave të INSTAT ranë në 648 milionë euro nga 703 milionë euro në të njëjtën periudhë të një viti më parë.

Ndërkohë projektbuxheti dhe paketa fiskale për vitin 2027 pritet të publikohen në fund të tetorit. Qeveria ka paralajmëruar një buxhet mbi 10 miliardë euro me fokus te shëndetësia, infrastruktura dhe mbrojtja, si dhe te mbështetja sociale. Mbetet për t’u parë se cilat prej kërkesave të biznesit do të reflektohen në paketën e re fiskale.

Top Channel