“Tripleta nuk përjashtohet”/ Marotta beson te sukseset e Interit: Le të shijojmë atë të vitit 2010, më pas…

Marotta u shpreh se gjithçka që ka arritur gjatë karrierës së tij lidhet me një vlerë të veçantë: pasionin.

“Gjithçka që kam ndërtuar buron nga një vlerë që e konsideroj shumë të rëndësishme: pasioni. E kam nisur që fëmijë me pasionin për këtë botë dhe kam realizuar një ëndërr. Sot jam jashtëzakonisht i lumtur”, deklaroi Marotta.

Sa i përket sezonit aktual, presidenti i Interit pranoi se kalendari ka sjellë një situatë të pazakontë, veçanërisht për shkak të pushimit të gjatë të kombëtareve.

“Ky vit ka një kalendar të veçantë. Për herë të parë kemi një pushim kaq të gjatë dhe duhet të eksperimentojmë për të kuptuar se cilat do të jenë pasojat, avantazhet dhe disavantazhet. E pranojmë këtë situatë dhe gjatë javës vazhdojmë të punojmë për ta çuar ekipin përpara”, tha Marotta.

Interi synon të konfirmojë veten në majë të futbollit italian, ndërsa në horizont është edhe Champions League.

Mesfushori Piotr Zielinski, gjithashtu i pranishëm në ceremoninë e çmimeve, e bëri të qartë objektivin evropian të zikaltërve: “Kemi ëndrrën për të fituar Champions League dhe do të japim gjithçka. Duam të bëjmë më mirë se sezonin e kaluar.”

Por pyetja që tërhoqi më shumë vëmendjen ishte ajo për një tjetër Triplete.

16 vite pas suksesit historik të skuadrës së José Mourinho-s, Interi mund të ëndërrojë sërish për një sezon ku do të fitojë Serie A, Champions League dhe Kupën e Italisë.

“Ndërkohë, le të shijojmë atë të vitit 2010. Kjo është një ëndërr, por ëndrrat mund të bëhen realitet. Detyra është të bëjmë mirë, ndërsa e drejta është të ëndërrojmë.”

Tripleta e vitit 2010 mbetet një prej kapitujve më të rëndësishëm në historinë e Interit. Skuadra e drejtuar nga José Mourinho fitoi Serie A, Kupën e Italisë dhe Champions League, duke u bërë klubi i parë italian që realizonte këtë sukses.

Top Channel